ԱԺ-ի արտահերթ նիստում ընդդիմություն- իշխանություն փոխադարձ մեղադրանքներն ու քննադատությունն այսօր վերածվեցին փոխադարձ վիրավորանքների ու հատեցին անձնականի սահմանը։
Կրքերը հատկապես թեժացան ԱԺ փոխնախագահ, «Իմ քայլը» խմբակցության պատգամավոր Ալեն Սիմոնյանի ելույթի ժամանակ, երբ բանախոսն ընդդիմադիր «Լուսավոր Հայաստան» խմբակցության ղեկավար Էդմոն Մարուքյանին մեղադրեց Սերժ Սարգսյանի ու նրա փեսա Միքայել Մինասյանի շահերը սպասարկելու մեջ:
Միքայել Մինասյանին երեք հոդվածով մեղադրանք է առաջադրվել. մանրամասներ
«Ես հետո կպատմեմ շատ-շատ բաներ, որոնք գիտեմ, թե ինչ է եղել, ոնց է եղել, ինչու է եղել»,- իր ելույթում ասաց Սիմոնյանը:
Էդմոն Մարուքյանն էլ տեղից արձագանքեց, թե ինքն էլ պատմելու շատ բան ունի: Ալեն Սիմոնյանին, սակայն, դուր չեկավ, որ պատգամավորն իրեն «դու»-ով դիմեց ու պահանջեց իր հետ «դուք»-ով խոսել:
««Դու»-ն դու ես, «դուք»-ով կխոսես սրանից հետո: Կեթաս Միշիկիդ հետ «դու»-ով կխոսես»,- ասաց Սիմոնյանը:
«Միշիկը քո աղբերն ա, այ հոգնած»,- արձագանքեց Մարուքյանը:
Ալեն Սիմոնյանն էլ իրեն ուղղված վիրավորանքին պատասխանեց՝ Մարուքյանին «քաղաքական տրյապկա» կոչելով:
ԱԺ դահլիճում շիկացած կրքերը դժվարությամբ հանդարտեցրեց նիստը վարող ԱԺ նախագահ Արարատ Միրզոյանը, որը մի քանի րոպե շարունակ գործընկերներին կոչ էր անում հիշել, որ ԱԺ-ում են գտնվում:
Իսկ վիճաբանող պատգամավորներն այդ ընթացքում արդեն միմյանց «անբարոյականի վաստակ» էին անվանում:
