ԵՐԵՎԱՆ, 27 ապրիլի - Sputnik. Վերջին զանգի արարողությունն այս տարի հետաձգվում է անորոշ ժամանակով: Այս մասին Facebook-ի ուղիղ եթերում հայտնեց ՀՀ ԿԳՄՍ նախարար Արայիկ Հարությունյանը:
Նախարարը նշեց, որ Վերջին զանգի միջոցառումները կանցկացվեն միայն այն ժամանակ, երբ առողջապահության նախարարությունը կհայտարարի համավարակի հաղթահարման մասին ու այսօր գործող սահմանափակումները կվերացվեն:
«Մենք միասին որևէ օր կորոշենք, ու Վերջին զանգի արարողությունները կիրականացնենք: Նախարարներն ու պաշտոնյաներն էլ ձեզ հետ միասին կմասնակցեն»,- դպրոցն ավատրող աշակերտներին խոստացավ նախարարը:
Նա չթաքցրեց, որ կարանտինից հետո նման միջոցառումների կարիքը շատերն ունեն, ուստի հենց թույլատրվի հանրային միջոցառումներ իրականացնել, կնշվի նաև վերջին զանգը:
«Ես գիտեմ, թե յուրաքանչյուրիս կյանքում այս իրադարձությունը որքան կարևոր է, որովհետև մի շատ կարևոր էջ փակում ենք ու մի շատ կարևոր էջ՝ բացում: Բայց գիտեք, որ ունենք համավարակի տարծման խնդիր, և ըստ էության պետք է արձանագրենք, որ երիտասարդները, պատանիներն ու աշակերտները, եթե անգամ հիվանդանում են, մեծ մասամբ ախտանիշներ չեն ունենում, բայց դառնում են վարակակիր: Եվ, եթե մեծ միջոցառումներ իրականացնենք, ապա իրենք կարող են վարակը տարածել իրենց ընտանիքներում, որտեղ կան տատիկ-պապիկներ, ծնողներ, որոնք կարող են ունենալ խրոնիկ հիվանդություններ»,- շեշտեց նախարարը:
Որոշ սահմանափակումներ կմեղմացվե՞ն. շուտով կլինի պարետի նոր որոշումը
Հիշեցնենք, որ ապրիլի 27-ի առավոտվա տվյալներով Հայաստանում կորոնավիրուսով վարակվածների թիվը հասել է 1808-ի: Նրանցից 848-ը առողջացել են, փաստացի բուժվողները 931–ն են, ընդհանուր առմամբ 18547 թեստավորում է իրականացվել, մինչ օրս գրանցվել է կորոնավիրուսից մահվան 29 դեպք:
