ԵՐԵՎԱՆ, 27 ապրիլի – Sputnik․ ՌԴ նախագահի մամուլի խոսնակ Դմիտրի Պեսկովը «ԱիՖ»-ին տված հարցազրույցում ասել է, որ Ռուսաստանում կորոնավիրուսով պայմանավորված իրավիճակը կարող է թեթևանալ հունիսին։
Նրա խոսքով՝ հաշվի առնելով Իսպանիայի կամ Իտալիայի օրինակը` կարելի է հասկանալ, որ ծայրահեղ վիճակն այնտեղ ձգվել է առավելագույնը մեկուկես ամիս։
«Գիտեք` մարդն այնպիսի էակ է, որ երևի մեկ-երկու ամիս անց մենք հազիվ կհիշենք այսօրվա դժվարությունները․․․ և արդեն մոտավորապես մայիսի կեսերից մենք պետք է այդ հարթության վրա լինենք։ Իսկ հետո, հավանաբար ամռան առաջին ամսին, արդեն ավելի հեշտ կլինի։ Եվ այս բոլոր դժվարությունները, կրկնում եմ, արագ կմոռացվեն»,- ասել է Պեսկովը։
Նա ավելացրել է, որ խոսքը, իհարկե, այն մարդկանց մասին չէ, որոնք կորցրել են մտերիմներին կամ իրենք են ծանր հիվանդ եղել։
Կորոնավիրուսը Հայաստանում. մեկ օրում վարակվածների թիվն ավելացել է 62-ով և դարձել 1808
«Բացի այդ, վիրուսից հետո մեզնից յուրաքանչյուրը պետք է շատ աշխատի, որպեսզի նվազագույնի հասցնի համավարակի հետևանքները։ Դա նույնպես բարդ շրջան է լինելու, հարկ կլինի մեծ ջանքեր ներդնել»,-ընդգծել է Կրեմլի ներկայացուցիչը։
Ստեղծված իրավիճակում պետությունը պետք է օգնի քաղաքացիներին և արդեն իսկ օգնում է։ Պեսկովը կարծում է, որ հարկ կլինի հստակ վերահսկել, թե ինչպես են կատարվում ընդունված որոշումները, որտեղ կարող են ինչ-որ խոչընդոտներ առաջանալ, մեխանիզմները չաշխատել, որտեղ է կարող է օգնությունը չհասնել մարդկանց։
«Խնդիրները, իհարկե, շատ են լինելու։ Բայց կյանքն ամեն դեպքում սովորական հունի մեջ կընկնի»,- համոզված է նա։
Նշենք, որ Ռուսաստանում կորոնավիրուսով վարակվածների ընդհանուր թիվը հասել է 80 949–ի, հիվանդությունից մահացել է 747 մարդ, առողջացել` 6,7 հազարը։
