ԵՐԵՎԱՆ, 27 ապրիլի – Sputnik. Մոսկվայի «Դոմոդեդովո» օդանավակայանում նախորդ օրվանից ՀՀ 27 քաղաքացի է մնացել։ Տեղեկությունը հայտնում է ՌԴ–ում ՀՀ դեսպանությունը։
«Վերջիններս չեն ցանկացել հետևել դեսպանության` օդանավակայանում չգտնվելու հորդորներին և հրաժարվել են հյուրատներ ու ժամանակավոր կացարաններ տեղափոխվելու հնարավորություններից»,– նշված է հաղորդագրության մեջ։
Միևնույն ժամանակ դեսպանությունը քաղաքացիներին տեղեկացրել է հնարավոր չվերթի սպասողների համար համապատասխան կարգով ցուցակագրում անցնելու անհրաժեշտության մասին` խնդրելով հարգել դեսպանությունում արդեն իսկ ցուցակագրված այն քաղաքացիներին, որոնք, դրսևորելով համբերատարություն, սպասում են հնարավոր առաջիկա չվերթով Հայաստան վերադառնալու իրենց հերթին։
«Տեղեկացնում ենք նաև, որ որևէ քաղաքացի, այդ թվում՝ օդանավակայանում գտնվող, չի կարող օգտվել Հայաստան մեկնելու հնարավորությունից՝ խախտելով արդեն իսկ հրապարակված ցուցակների հերթականությունը»,– շեշտում է դեսպանությունը` ընդգծելով, որ Մոսկվայից դեպի Երևան հնարավոր չվերթի մասին տեղեկություն ստանալուն պես լրացուցիչ կհայտնեն:
Ավելի վաղ դեսպանությունը հայտնել էր, որ այս ամսվա ընթացքում կազմակերպվել է 7 չարտերային չվերթ՝ ապահովելով մոտ 1500 քաղաքացու վերադարձը Հայաստան։
ՌԴ-ում ՀՀ դեսպանության 7 աշխատակից է մեկուսացվել կորոնավիրուսի կասկածանքով. Տողանյան
Այդուհանդերձ, ավելի քան 2 հազար քաղաքացի շարունակում է մնալ հերթագրված և ազգականների/հարազատների մոտ կամ դեսպանության տրամադրած կացարաններում սպասում է մեկնելու իր հերթին։
