ԵՐԵՎԱՆ, 27 ապրիլի — Sputnik. ԱԺ իշխող «Իմ քայլը» խմբակցության պատգամավորներն այսօր շրջանառության մեջ են դրել օրենքի մի նախագիծ, որով մտադիր են «մաքրել» հեռուստառադիոեթերը: Նախաձեռնության մասին facebook-ում հայտնել է դրա հեղինակներից մեկը` պատգամավոր Մխիթար Հայրապետյանը:
Երբ խոսափողը միացրած է, կամ ուղիղ եթերի վտանգավոր կողմը
«Ինչպես ԱԺ ամբիոնից քանիցս հայտարարել եմ, սույն օրենքով հեռուստատեսության և ռադիոյի ոլորտում մենք լրջագույն բարեփոխումներ ենք իրականացնելու՝ դրանով նաև վերահաստատելով եթերը մաքրելու, վարակազերծելու մեր կամքն ու պատրաստակամությունը»,- գրում է պատգամավորը՝ հիշեցնելով, որ այս «կենսական անհրաժեշտության» օրենքի մասին վերջին մեկ տարվա ընթացքում շատ է խոսվել:
Նշենք, որ խոսքը «Տեսալսողական մեդիայի» մասին ՀՀ օրենքի նախագծի ու «Լիցենզավորման մասին» օրենքում փոփոխություններ կատարելու նախագծի մասին է:
Օրինագծերի փաթեթի համահեղինակներ են նաև Լիլիթ Մակունցը, Վահագն Թևոսյանը և Արման Բաբաջանյանը:
Օրենսդրական նախաձեռնության վերաբերյալ այլ մանրամասներ Մխիթար Հայրապետյանը չի բացահայտում՝ պատրաստակամություն հայտնելով դրա վերաբերյալ հարցերին պատասխանել ապրիլի 30-ին` ժամը 12:00-ին, գործընկերների հետ ֆեյսբուքյան ուղիղ հեռարձակման ժամանակ:
