ԵՐԵՎԱՆ, 27 ապրիլի - Sputnik. Գյումրու ինֆեկցիոն հիվանդանոցում այս պահին կորոնավիրուսով 65 հիվանդ է բուժում ստանում, նրանցից 59-ը Շիրակի մարզի բնակիչ են: Տեղեկությունը հայտնում է Շիրակի մարզպետարանի մամուլի ծառայությունը:
Նշենք, որ մարտի 25-ին հիվանդանոցում բուժում էր ստանում 63 քաղաքացի:
«Գյումրու ինֆեկցիոն հիվանդանոցում բուժում ստացող 59 հիվանդներից զատ 11 հիվանդներ բուժում են ստանում մայրաքաղաքում, 10 անձ առողջացել և դուրս է գրվել, հիվանդության հետևանքով արձանագրվել է մահվան 3 դեպք: Շիրակի մարզում այս պահին մեկուսացման և ինքնամեկուսացման ցուցում ունի 277 քաղաքացի»,-նշված է մարզպետարանի տարածած հաղորդագրության մեջ։
Մարտի մեկից մինչ օրս մարզի բուժհաստատություններում և հիվանդությունների վերահսկման և կանխարգելման ազգային կենտրոնի մարզային կենտրոնում իրականացվել է 686 նմուշառում։ Ռիսկերի և շփումների բացահայտման և մեկուսացման աշխատանքներն իրականացվում են շարունակաբար։
Արթիկի քաղաքապետարանից էլ հայտնում են, որ օրերս կորոնավիրուսով վարակված 65-ամյա տղամարդու մոտ ախտորոշվել է նոր սկսվող թոքաբորբ, հիվանդը տեղափոխվել է Նորքի ինֆեկցիոն հիվանդանոց: Արդեն իսկ մեկուսացվել են նրա ընտանիքի 13 անդամները: Մեր ունեցած տեղեկություններով՝ նա տաքսու վարորդ է: Նրա շփման շրջանակից կասկածելի ախտանիշներով մեկ անձի թեստավորման պատասխանը եղել է բացասական: Աշխատանքներ են տարվում կորոնավիրուսով վարակված քաղաքացու շփման շրջանակը պարզելու և ըստ բժշկական ցուցումների՝ համապատասխան ընթացք տալու համար։
«Վտանգը եկել է այնտեղից, որտեղից չենք սպասել». մանրամասներ բժիշկների վարակման դեպքից
Հավելենք, որ ՀՀ պարետ Տիգրան Ավինյանի որոշմամբ՝ մարզի Մարալիկ ու Ձորակապ բնակավայրերում տեղաշարժի սահմանափակումները շարունակվում են:
