ԵՐԵՎԱՆ, 24 ապրիլի – Sputnik. Հայոց Ցեղասպանության սրբադասված զոհերի հիշատակը հավերժացնող Ծիծեռնակաբերդի հուշահամալիրում մեկնարկել է Ցեղասպանության 105-ամյա տարելիցին նվիրված «Ոգեկոչման գիշեր» համերգը։ Այն սկսվեց աշխարհահռչակ երաժիշտ Նարեկ Հախնազարյանի ելույթով. նա կատարեց Կոմիտասի «Կռունկը»։ Ինչպես արդեն տեղեկացրել էինք, համերգին կնվագի նաև փոքրիկ տաղանդավոր դուդուկահար Թաթուլ Համբարձումյանը։
Հայերի անեծք, թե խղճի խայթ. ինչու քուրդ ծերունին չէր կարողանում հանգիստ մեռնել
Հուշակոթողի սյուների վրա մեկ առ մեկ հայտնվում են այն մարդկանց անունները, ովքեր, չկարողանալով այսօր այցելել Ծիծեռնակաբերդ, հաղորդագրություն էին ուղարկել 1915 կարճ համարին` այդպիսով օնլայն մասնակցելով հարգանքի տուրքին։
Նշենք, որ կորոնավիրուսի տարածումը կանխելու համար Հայաստանում և Արցախում այս տարվա ապրիլի 24–ին մասսայական միջոցառումներ չեն իրականցվել։ Արգելվել է մարդկանց ամենամյա երթը դեպի Ծիծեռնակաբերդ։
Ծիծեռնակաբերդում նախատեսված էր մոտ 11 ժամ տևողությամբ համերգ, որի ընթացքում կհնչի մոտ 60 ելույթ։ Ելույթ կունենան սիմֆոնիկ, ֆիլհարմոնիկ նվագախմբերը, Կամերային երաժշտության ազգային կենտրոնը` իր երգչախմբերով և նվագախմբերով, լարային քառյակներ, ճանաչված օպերային երգիչներ և այլք։
Ամբողջ ծրագիրը լինելու է բազմաժանր ՝սկսած ժողովրդական երգ-երաժշտությունից մինչև միջնադարյան երաժշտության ջազային մշակումներ։
