ԵՐԵՎԱՆ, 24 ապրիլի – Sputnik, Արմենուհի Մխոյան. Հայոց ցեղասպանության 105-րդ տարելիցի օրը հայ-թուրքական սահմանին՝ պատմական Անի մայրաքաղաքին շատ մոտ, 21 մետր բարձրության վրա վեր է խոյացել Հայոց եռագույնը: Տեղադրվել է նաև քահանայի ձեռամբ օծված խաչքար:
Այսօր կատարված արարողությանը ներկա էին Շիրակի տեղական ինքնակառավարման մարմինների ներկայացուցիչներ։ Դրոշը Հայաստանում տեղադրված ամենամեծ դրոշներից է, այն շատ հստակ է երևում սահմանից այն կողմ:
«Անշուշտ շատ հուզիչ ու խորհրդանշական էր: Հայաստանի դրոշ` Անի մայրաքաղաքի դիմաց, որը վեր խոյացավ խորհրդանշական ՝ ապրիլի 24-ին։ Այն իր մեջ ամփոփում է կարևոր մի միտք՝ եղել ենք, կանք ու կլինենք։ Իսկ սահմաններն ու սահմանային բնակավայրերը պետք է հայի շնչով լցվեն և առավել ամուր լինեն»,- Sputnik Արմենիայի հետ զրույցում ասաց Շիրակի մարզպետ Տիգրան Պետրոսյանը:
Նախաձեռնությունը հնարավոր է դարձել ռուսաստանաբնակ Ասլանյան, Խռանյան և Գրիգորյան ընտանիքների աջակցության շնորհիվ։
«Երբեք չպետք է մոռանանք Հայոց ցեղասպանության զոհերի մասին». Թրյուդոյի գրառումը
Հիշեցնենք, որ դեռ անցած տարի մարտին Շիրակի Անիավան խոշորացված համայնքի ղեկավար Մարտիրոս Միրոյանը եռագույն էր տեղադրվել նաև հայ-թուրքական սահմանին գտնվող Նորշենում, որը ավելի շատ հայտնի է Խարկով անունով:
«Այս նոր դրոշն անմիջապես Անի դիմաց է տեղադրվել, շատ ավելի տեսանելի վայրում: Ի դեպ, սա Շիրակի մարզի ամենամեծ դրոշն է»,-նշեց Տիգրան Պետրոսյանը` վստահեցնելով, որ շարունակվում են Նորշենի սահմանային կարգավիճակի փոփոխության, սահմանակից գյուղ՝ առանց անցաթուղթ մուտք գործելու հարցի հետ կապված գերատեսչական աշխատանքները:
Նորշեն (Խարկով) գյուղն Անի բերդաքաղաքից բաժանվում է ընդամենը Ախուրյան գետով: Սահմանային գյուղ ազատ մտնել ներկա պահին հնարավոր չէ: Պարտադիր պետք է ստանալ սահմանապահ ուղեկալի թույլտվությունը, որը երկարատեւ գործընթաց է: Նորշենը, շատ մոտ գտնվելով Անիին, հրաշալի դիտակետ է։ Գյուղն այսօր ունի միայն մեկ բնակիչ:
Մարզպետն այսօր այցելել է նաև Խարկովում գյուղի միակ բնակչին` 83-ամյա Վահանդուխտ տատին:
