ԵՐԵՎԱՆ, 23 ապրիլի – Sputnik. Հայաստանի Հանրապետության նախագահ Արմեն Սարգսյանը Հայոց ցեղասպանության 105-րդ տարելիցի կապակցությամբ ուղերձ է հղել հայ ժողովրդին, հայտնում է ՀՀ նախագահի մամուլի ծառայությունը:
«Այս տարի Հայոց Ցեղասպանության զոհերի տարելիցն անցնում է համավարակի պարտադրած արարողակարգով: Սակայն մեր հարգանքի տուրքը մեր սուրբ նահատակների հիշատակին երբեք չի չափվել միայն Եղեռնի հուշահամալիր կամ Հայոց ցեղասպանության այլ հուշարձաններ այցելությամբ: Մենք հիշում ենք մեր զոհերին մշտապես ու ամենուր՝ աշխարհում ուր էլ որ լինենք, աղոթում ենք նրանց համար մեր հոգում և մտքում՝ անուն առ անուն: Հիշողությունն ու կորստի ցավը՝ միահյուսված ապրելո՛վ հաղթելու ու արդարության հաղթանակին հասնելու մեր կամքի հետ, ուղեկցում են մեզ արդեն 105 տարի»,-ասել է ՀՀ նախագահը:
Սարգսյանն ընդգծել է, որ պատմաբանները և վերլուծաբանները, ժամանակի պետական և քաղաքական գործիչներն առաջին աշխարհամարտից հետո հաստատված համաշխարհային կարգի ամենամեծ անարդարություններից մեկը համարում են հայ ժողովրդի իրավունքների բացարձակ անտեսումը: Նա նշել է, որ 1.5 մլն մարդկային կյանքերի կորուստն էապես ազդել է հայ ժողովրդի հետագա վերարտադրման վրա, և եթե չլիներ Հայոց ցեղասպանությունը, այսօր պետք է լինեինք ոչ թե 10-12 մլն, այլ առնվազն դրա կրկնակին:
Ցեղասպանության կարգախոսը կփոխվի՞. կառավարությունում այս թեմայով քննարկում է եղել
Անդրադառնալով Հայոց ցեղասպանության ճանաչման հարցին, ՀՀ նախագահն անընդունելի է համարել դրա դիտարկումն Անկարայի հետ տնտեսական կամ քաղաքական այսրոպեական շահերի տեսանկյունից:
«Մենք չենք կարող մի կողմից հայտարարել մարդատյացության, խտրականության, անհանդուրժողականության, հակասեմականության, ժխտողականության և այլ համամարդկային չարիքների դեմ համատեղ պայքարի մասին, մյուս կողմից՝ Հայոց ցեղասպանության հարցով «դիվանագիտություն բանեցնել» Թուրքիայի հետ»,-ասել է նախագահը:
Նա իր երախտագիտությունն է հայտնել բոլոր այն երկրներին, որոնք ընդունել են Հայոց ցեղասպանությունը և դատապարտել այն և անընդունելի համարում Թուրքիայի իրարահաջորդ կառավարությունների դիրքորոշումը, որոնք խուսափել և խուսափում են ցեղասպանության ճանաչումից և պետական մակարդակով առաջ են տանում ժխտողականության քաղաքականությունը:
«Ցեղասպանության հանցագործությունը վաղեմության ժամկետ չունի: Հայոց ցեղասպանության ճանաչումը Թուրքիայի կողմից և դրա հետևանքների վերացումը անվտանգության երաշխիք են Հայաստանի և հայ ժողովրդի, ինչպես նաև տարածաշրջանի համար:Մենք չենք կարող մոռանալ Հայոց ցեղասպանությունը և չենք կարող հաշտվել դրա հետևանքների հետ»,-ասել է Սարգսյանը:
Նախագահն ընդգծել է, որ հայ ժողովուրդը կարողացել է հաղթել մահին, կատարվածը վերապրել և վերածնվել: Դրա ապացույցը այսօրվա անկախ Հայաստանի գոյությունն է, ազատ Արցախն ու կազմակերպված ու հաջողակ Սփյուռքը:
Ոստիկանությունը փակելու է Ծիծեռնակաբերդի մուտքը. պարետն ասել է՝ ինչ է պետք անել
Հիշեցնենք, որ Հայոց ցեղասպանության զոհերի հուշահամալիրի մուտքն ապրիլի 24-ին փակ կլինի։
Ավելի վաղ վարչապետի աշխատակազմի ղեկավար Էդուարդ Աղաջանյանը հայտնել էր, որ միջոցառումները կմեկնարկեն ապրիլի 23-ին։ Երեկոյան 21։00-ին կհնչեն եկեղեցական զանգերի ղողանջներ, որոնց ներքո կմարեն Երևանի և մարզկենտրոնների փողոցների լույսերը։ Կառավարությունը կոչ է անում 21:00-ից սկսած մարել բնակարանների լույսերը և բջջային հեռախոսների լույսերով պատուհաններից խորհրդանշական ներկայություն ապահովել անմար կրակի շուրջ։
Ապրիլի 24-ին, ժամը 10–ին կմեկնարկեն ՀՀ վարչապետի, նախագահի, Աեայն հայոց կաթողիկոսի այցերը հուշահամալիր։
Մարեք լույսերը, միացրեք հեռախոսները. ապրիլի 24-ին Եղեռնի զոհերի հուշահամալիրը փակ կլինի
