ԵՐԵՎԱՆ, 22 ապրիլի - Sputnik. Ռուսաստանում մնացած մեր հայրենակիցներին Հայաստան վերադարձնելու համար վաղը ևս մեկ չարտերային թռիչք կկազմակերպվի: ՌԴ-ում Հայաստանի Հանրապետության դեսպանությունը հայտնում է, որ Սանկտ Պետերբուրգում ՀՀ Գլխավոր հյուպատոսության և «Ուրալյան ավիաուղիներ» ընկերության պայմանավորվածության համաձայն՝ ապրիլի 23-ին՝ ժամը 12․00-ին, տեղի կունենա Մոսկվա-Սանկտ Պետերբուրգ-Երևան չարտերային չվերթը։
«Մոսկվայից նշյալ չվերթով Հայաստան կմեկնեն դեսպանությունում ցուցակագրված 254-ից 360 համարի ներքո նշված քաղաքացիները։ Խնդրում ենք նշյալ քաղաքացիներին «Դոմոդեդովո» օդանավակայան ժամանել ժամը 08։30-ից սկսած (հաշվառման սեղաններ՝ 34-36 )»,- նշված է հաղորդագրության մեջ։
Դեսպանությունը տեղեկացնում է նաև, որ նախապես հաստատված մոտ 20 քաղաքացի այսօր չեն ներկայացել Մոսկվա-Երևան չվերթին, որն իրականացվել է Մոսկվայի «Դոմոդեդովո» օդանավակայանից։
Մոսկվա-Սանկտ Պետերբուրգ-Երևան չարտերային չվերթով Հայաստան վերադարձող քաղաքացիները ևս անմիջապես օդանավակայանից կտեղափոխվեն մեկուսացման հատուկ վայր, որտեղ կգտնվեն 14-օրյա պարտադիր կարանտինային ռեժիմում:
Ռուսաստանում մնացած ՀՀ քաղաքացիներին հայրենիք վերադարձնելու համար ավելի վաղ 3 չարտերային չվերթ է իրականացվել Մոսկվայից, մեկական Կրասնոդարից և Դոնի Ռոստովից: Այսօր Հայաստան է ժամանել Մոսկվա-Երևան արդեն 4-րդ չարտերային չվերթն իրականացնող օդանավը: Վերադարձած բոլոր քաղաքացիները մեկուսացված են:
