ԵՐԵՎԱՆ, 21 ապրիլի — Sputnik. Հայաստանի Հանրապետության քաղաքացիներին Հայաստան վերադարձնելու նպատակով ապրիլի 22-ին՝ ժամը 15։00-ին, տեղի կունենա «S7» ավիաընկերության կողմից իրականացվող Մոսկվա-Երևան չարտերային թռիչքը։ Տեղեկությունը Facebook-ի իր էջում հաղորդում է Ռուսաստանում Հայաստանի դեսպանությունը:
«Դեսպանությունում ցուցակագրված՝ 1-ից 200 համարի ներքո նշված քաղաքացիներին հաշվառում անցնելու նպատակով խնդրում ենք «Դոմոդեդովո» օդանավակայան ժամանել ժամը 11։00-ից սկսած»,-ասվում է դեսպանատան տարածած հայտարարության մեջ:
Նշվում է, որ չվերթի կազմակերպման և քաղաքացիների հաշվառման ընթացքին հետևելու նպատակով օդանավակայանում գտնվելու են ՀՀ ոստիկանության ներկայացուցիչ էդգար Արևշատյանը, ԱԻՆ ներկայացուցիչ Արտակ Ղազարյանն ու դեսպանության արարողակարգի բաժնի ղեկավար Էդգար Խաչատրյանը։
Նշված թռիչքով Հայաստան վերադարձող քաղաքացիները կենթարկվեն 14-օրյա պարտադիր կարանտինային ռեժիմի։
Հիշեցնենք՝ ապրիլի 12-ին «Դոմոդեդովո» օդանավակայանից Մոսկվա-Երևան երրորդ չարտերային չվերթով հայրենիք վերադարձան 230 քաղաքացի, որոնցից 201-ի մեկնումը կազմակերպվել է անվճար։ Ավելի վաղ՝ ապրիլի 6- ին և 7-ին կազմակերպված չարտերային չվերթերով 400-ից ավելի քաղաքացի է տեղափոխվել Հայաստան։
Հայրենիք վերադառնալու համար դեսպանությունում ցուցակագրվածների թիվը, սակայն, գրեթե 2000 էր։
Չարտերային չվերթով Հայաստան վերադարձածներին մեկուսացրել են հյուրանոցում. տեսանյութ
