ԵՐԵՎԱՆ, 20 ապրիլի - Sputnik. ՀՀ աշխատանքի և սոցիալական հարցերի նախարարությունը քաղաքացիներից նամակներ է ստանում, որ որոշ գործատուներ «հորդորում» են իրենց աշխատակիցներին կորոնավիրուսի տնտեսական հետևանքների չեզոքացման 8-րդ միջոցառման շրջանակում ստացած գումարը կանխիկացնել և տալ իրենց: Այս մասին Facebook-ի պաշտոնական էջում հայտնում է աշխատանքի և սոցիալական հարցերի նախարարությունը՝ քաղաքացիներին զգուշացնելով չտրվել գործատուների խարդավանքներին:
«Եվս մեկ անգամ հիշեցնում ենք, որ այս միջոցառման շահառու կարող են դառնալ միայն վարձու աշխատողները, ոչ թե գործատուները: Այսինքն՝ պետության աջակցությունն ուղղված է աշխատողին, ոչ թե գործատուին: Գումարը, որը փոխանցվել է կոնկրետ աշխատողի անունով պատկանում է բացառապես տվյալ մարդուն: Գումարը կիսելու, մասնակիորեն կամ ամբողջությամբ երկրորդ անձի փոխանցելու պարտավորություն չկա»,- հիշեցնում է նախարարությունը:
Ինչ վերաբերում է գործատուների այսօրինակ ապօրինի գործողություններին, նախարարությունը հայտնում է, որ յուրաքանչյուր ահազանգ փոխանցվում է իրավապահ մարմիններին՝ համապատասխան գործողությունների համար:
Կառավարությունում ուզում են աջակցել նաև անչափահաս երեխա չունեցող օրավարձով աշխատողներին
Հիշեցնենք՝ կորոնավիրուսի տնտեսական հետևանքների չեզոքացման 8-րդ միջոցառման շրջանակում պետական աջակցությունից օտգվում են ստեղծված տնտեսական իրավիճակից առավել տուժած ոլորտների՝ հանրային սննդի, հյուրանոցային-հյուրատնային բիզնեսի, զբոսաշրջության ոլորտի, ինչպես նաև վարսավիրանոցների օրինական գրանցված աշխատակիցները՝ միջին աշխատավարձի 50 տոկոսի, բայց ոչ պակաս, քան 68 000 դրամի չափով:
Նշենք, որ ՀՀ կառավարությունը հակաճգնաժամային 14 ծրագիր է մշակել, որոնցից 5-ն ուղղված են տնտեսական, 9-ը՝ սոցիալական տարբեր խմբերին:
