ԵՐԵՎԱՆ, 20 ապրիլի – Sputnik. «Ազիմուտ» ավիաընկերության իրականացրած Կրասնոդար-Երևան և Դոնի Ռոստով-Երևան չարտերային երկու թռիչքներով ապրիլի 19-ին և 20-ին Հայաստան են ժամանել ՀՀ 200 քաղաքացի: Տեղեկությունը հայտնում է ՀՀ փոխվարչապետ, պարետ Տիգրան Ավինյանը։
«Նրանք 14 օր գտնվելու են պարտադիր կարանտինային ռեժիմում: Շնորհակալություն ենք հայտնում Դոնի Ռոստովում ՀՀ գլխավոր հյուպատոսությանը, տեղի հայ համայնքային կառույցների ղեկավարներին և բարերարներին՝ ներդրած ջանքերի և մեր քաղաքացիների վերադարձն անվճար ապահովելու համար: Արտերկրում գտնվող և Հայաստան վերադառնալու ցանկություն հայտնած ՀՀ քաղաքացիների վերադարձը կազմակերպելու ուղղությամբ մեր քայլերը կրում են շարունակական բնույթ»,– Facebook-ի իր էջում գրել է նա:
ՌԴ–ում Հայաստանի դեսպանությունը հայտնում է, որ նշված չվերթերը կազմակերպելիս առաջնահերթություն է տրվել նախապես ցուցակագրված, Ռոստովի մարզում գտնվող ՀՀ այն քաղաքացիներին, որոնք բախվել էին կացության հետ կապված խնդիրների, վերջին շրջանում Գլխավոր հյուպատոսության կողմից տրամադրված կացարանում գտնվող քաղաքացիներին, մանկահասակ երեխաներ ունեցող քաղաքացիներին, մեծահասակներին, հետվիրահատական վերականգնման անհրաժեշտություն ունեցող և բուժման ցուցումով Հայաստան վերադարձողներին, ծայրաստիճան բարդ կացության մեջ հայտնված քաղաքացիներին։
