ԵՐԵՎԱՆ, 18 ապրիլի – Sputnik. Ռուսաստանի առողջապահության նախարարության գլխավոր մանկաբարձ–գինեկոլոգ, ՌԳԱ ակադեմիկոս Լեյլա Ադամյանը պատմել է COVID-19–ով վարակված հղիների մասին։
«Աշխարհում քիչ են հղիները, որոնք ծանր են տանում կորոնավիրուսային վարակը», – «Ռոսիյսկայա գազետային» տված հարցազրույցում ասել է նա։
Բժշկուհու խոսքով` բարձր ռիսկի խմբում են այն հղիները, որոնք ուղեկցող հիվանդություններ ունեն` սրտանոթային, շնչուղիների (թոքաբորբ, ասթմա), շաքարային դիաբետ, զարկերակային ճնշում, խրոնիկ բորբոքումներ։
Լեյլա Ադամյանը նշել է, որ պտուղը կորոնավիրուսային վարակի ուղիղ թիրախը չէ։ Համենայն դեպս, ապացույց չկա, որ վիրուսն ազդում է պտղի վրա։
«Որպես կանոն, երեխաներն առողջ են ծնվում։ Շատ բան, իհարկե, կախված է մոր վիճակից և կորոնավիրուսային վարակի ծանրության աստիճանից։ Ծննդաբերությունը սովորաբար թեթև է ընթանում։ Այսինքն` երեխաները, որպես կանոն, չեն տուժում, ծնվում են առանց հիվանդության ախտանշանների։ Ամենակարևորը նրանց ժամանակին մեկուսացնելն է», – ասել է նա։
Ադամյանը հիշեցրել է, որ հղիության ժամանակ շատ կարևոր է սթրեսից խուսափելը։ Բժիշկը խորհուրդ է տվել չճշտված տեղեկություններ չկարդալ և պահպանել հիգիենայի բոլոր կանոնները։
«Սիրելի հղիներ։ Ձեզ Աստված է պաշտպանում։ Լավատես եղեք։ Ընկերքն ու մոր առողջությունը պտղին հուսալիորեն պաշտպանում են վիրուսից», – ասել է փորձառու բժիշկը։
«Եթե այս տեմպը պահպանվի, մայիսի 4-ին կունենանք կորոնավիրուսի 2500 դեպք». Արսեն Թորոսյան
Ադամյանի խոսքով` Ռուսաստանում շուրջ 70 հղի վարակակիր կա։ Մոսկվայում բժիշկների հսկողության տակ է գտնվում COVID-19–ով վարակված ընդամենը 34 հղի (11–ն արդեն ծննդաբերել են)։
Նրանցից ոչ մեկը թոքերի օդափոխման արհեստական սարքի կարիք չի ունեցել։ Այսինքն` կորոնավիրուսային վարակը հիմնականում հանգիստ ընթացք է ունենում։
Այժմ Կուլակովի անվան մանկաբարձության և գինեկոլոգիայի գիտահետազոտական կենտրոնի հիման վրա ստեղծվել է անեսթեզիոլոգիայի-ռեանիմատոլոգիայի դաշնային հեռակա խորհրդատվական կենտրոն հղիների համար։ Կենտրոնը զբաղվում է COVID-19 –ի և թոքաբորբի ախտորոշման ու բուժման հարցերով։
Հիմնական գործառույթն է կորոնավիրուսի նոր տեսակով և (կամ) թոքաբորբով, շնչառական անբավարարության խնդիրներով հղիների, ծննդկանների համար բժշկական խորհրդատվության տրամադրումը։ Կենտրոնն աշխատում է շուրջօրյա ռեժիմով։
Հավելենք, որ Լեյլա Ադամյանը վերջերս առաջին ծոռն է ունեցել. լույս աշխարհ է եկել թոռան` Էդուարդի որդին։ Բժիշկը խոստովանել է, որ փոքրիկի ծնունդը մեծ երջանկություն է իրենց ամբողջ մեծ ընտանիքի համար։
Կորոնավիրուսով վարակված քանի՞ մարդ կա աշխարհում. նոր տվյալներ
