ԵՐԵՎԱՆ, 18 ապրիլի – Sputnik. Շիրակի մարզի Անի համայնքի Մարալիկ և Ձորակապ բնակավայրերում հատուկ սահմանափակումներ կկիրառվեն։ Պարետ Տիգրան Ավինյանն այսօր նոր որոշում է ստորագրել, որը ներկայացնում ենք ստորև.
- սահմանել բնակավայրերի վարչական սահման մուտք գործելու և վարչական սահմաններից ելք կատարելու հատուկ ռեժիմ` արգելելով անձանց և տրանսպորտային միջոցների մուտքն ու ելքը՝ բացառությամբ առաջին անհրաժեշտության ապրանքների, պարագաների, սննդամթերքի, դեղորայքի, վառելիքի մատակարարման և գյուղատնտեսական ու այգեգործական աշխատանքներ իրականացնելու նպատակով անձանց տեղաշարժի և Մ1 միջպետական ճանապարհով ավտոմոբիլային տրանսպորտի երթևեկության,
- գյուղատնտեսական և այգեգործական աշխատանքներ իրականացնելու նպատակով անձանց ելքն ու մուտքը թույլատրել միայն Անի համայնքի ղեկավարի կողմից ստորագրված և կնքված՝ սույն որոշման հավելվածով սահմանված ձևանմուշի առկայության դեպքում,
- Մ1 միջպետական ճանապարհով ավտոմոբիլային տրանսպորտի երթևեկության վերահսկման նպատակով ՀՀ ոստիկանության կողմից Մարալիկ և Ձորակապ բնակավայրերի ներսում սահմանել վերակարգեր և բացառել երթևեկող տրանսպորտային միջոցների կանգ առնելը Մարալիկ և Ձորակապ բնակավայրերի վարչական սահմաններում:
Մարալիկ և Ձորակապ բնակավայրեր մուտք գործելու սահմանափակման համար բացառություն է սահմանվել մինչև 2020 թվականի ապրիլի 19-ը՝ ժամը 22:00-ն՝ թույլատրելով Մարալիկ և Ձորակապ բնակավայրերում մշտական բնակության իրավունք ունեցող կամ փաստացի բնակվող անձանց մուտքը։
Հատուկ ռեժիմի իրականացումն ապահովելու նպատակով ՀՀ ազգային անվտանգության ծառայության և ՀՀ ոստիկանության կողմից սահմանված վայրերում տեղադրվելու են հատուկ անցակետեր և զննման կետեր՝ Մարալիկ և Ձորակապ բնակավայրերի վարչական տարածք թույլատրվող անձանց ու տրանսպորտային միջոցների զննումն իրականացնելու նպատակով։
Որոշումն ուժի մեջ է մտնում 2020 թվականի ապրիլի 19-ին՝ ժամը 6:00-ին, և գործում է մինչև 2020 թվականի ապրիլի 25-ը՝ ժամը 23։59-ը:
Ավելի վաղ հայտնել էինք, որ ապրիլի 13-14–ին կատարված նմուշառումների արդյունքում Մարալիկ քաղաքի հիվանդանոցի 10 աշխատակցի մոտ կորոնավիրուս էր հաստատվել: Որոշվել էր հաստատության բոլոր՝ ավելի քան 60 աշխատակիցների նմուշառում իրականացնել: ՀՀ Շիրակի մարզպետն այսօր լրագրողներին ասաց, որ նմուշառումների արդյունքները ստացել են, 8-ը դրական են եղել, ինչը նշանակում է, որ Մարալիկում կորոնովիրուսով վարակված 18 մարդ կա։
Առողջության կենտրոնի այն հիվանդները, որոնց թեստերի պատասխանը դրական է եղել, տեղափոխվել են Գյումրու ինֆեկցիոն հիվանդանոց:
Այս պահին Շիրակի մարզում կորոնավիրուսով վարակված 37 մարդ կա։ Գյումրու ինֆեկցիոն հիվանդանոցը, Շիրակի մարզպետի հավաստմամբ, ունի մինչև 100 հիվանդի սպասարկման հնարավորություն:
Հիշեցնենք՝ անցնող մեկ օրվա ընթացքում Հայաստանում գրանցվել է կորոնավիրուսային հիվանդության հաստատված 47 նոր դեպք: Առողջացումով դուրս են գրվել 121 քաղաքացի։ Վարակվածների թիվը հասել է 1248–ի, մահացածներինը` 20-ի։
