ԵՐԵՎԱՆ, 16 ապրիլի — Sputnik. Ցանը ոտքերի վրա կարող է վկայել կորոնավիրուսային վարակի առկայության մասին։ Metro պարբերականը հայտնում է, որ այս եզրակացությանն են հանգել իտալացի ու իսպանացի բժիշկները, որոնք աշխատել են COVID-19-ով հիվանդների հետ ու վերլուծել մի քանի նման դեպք։
Աշխարհում COVID-19–ով վարակվածների թիվը հատեց 2 միլիոնի սահմանը
Պարբերականը պատմում է Իսպանիայից 13 տարեկան պացիենտի մասին, որը հիվանդանոց էր տեղափոխվել կրունկների վրա հայտնված ցանով։ Բժիշկները սկզբում կարծել էին, որ տղային սարդ է կծել։ Սակայն երկու օր անց երեխայի մոտ կորոնավիրուսի տարածված ախտանիշներ էին ի հայտ եկել՝ տենդ, մկանային ցավ, գլխացավ, նաև կրունկների քոր ու ծակոցներ։ Մարտի 29-ին անցկացրած թեստը ցույց է տվել, որ նա կորոնավիրուսով է վարակված։
Metro-ի փոխանցմամբ՝ այս պահին հիվանդանոցում գտնվող ամեն հինգերորդ վարակված իտալացին մաշկի հետ կապված խնդիր ունի։ Բժիշկների տվյալներով՝ այդ անսովոր ախտանիշը հատկապես հաճախ հանդիպում է երեխաների ու դեռահասների մոտ։
«Եթե հետագա լաբորատոր ուսումնասիրությունները հաստատեն, որ մենք COVID-19-ի նոր կլինիկական ախտանիշ ենք բացահայտել, դա կարող է օգտակար լինել վարակման թեթև տեսակը երեխաների ու պատանիների մոտ բացահայտելու գործում», - ընդգծել է մանկական մաշկաբան Մացոտա Տրոկոլին (Mazzotta Troccoli) իտալական Բարի քաղաքից։
Իսպանացի մասնագետներն էլ են նկատել կորոնավիրուսային վարակի նոր ախտանիշը։
«Այդ ախտանիշը գնալով ավելի հաճախ է հանդիպում COVID-19-ով վարակված հիվանդների, հատկապես՝ երեխաների ու դեռահաասների մոտ, - հաստատել է մանկաբույժների ասոցիացիայի իսպանացի ներկայացուցիչը, - Կան նաև դեպքեր, երբ մեծահասակ պացիենտների մոտ է նման ախտանիշ հայտնվում»։
Փորձագետը պարզաբանել է, որ կորոնավիրուսի ժամանակ ցանը նման է ծաղիկի կամ կարմրուկի ժամանակ արտահայտված ցանին։ Որպես կանոն՝ կարմիր կետերն առաջանում են ոտքերի մատների վրա ու հետո, հետք չթողնելով, լավանում են։
Մանկաբույժների ասոցիացիան կոչ է արել ամենայն լրջությամբ վերաբերվել նման ցանին ու հայտնվելու դեպքում տանը ինքնամեկուսանալ։ Փորձագետները խորհուրդ են տալիս քաղաքացիներին միայն այդ ախտանիշի դեպքում հիվանդանոց չդիմել, սակայն եթե ցանը հայտնվում է, ավելի ուշադիր հետևել սեփական առողջական վիճակին։
«Շատերին հուզում է հարցը՝ արդյո՞ք COVID-19-ն անդրադառնում է մաշկի վրա։ Պատասխանը դրական է», - ամփոփել է Կալիֆոռնիայի համալսարանի մաշկաբանության ամբիոնի դոցենտ Ռենդի Ջեյքոբսը (Randy Jacobs)։
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ: Կազմակերպությունը բոլոր պետություններին կոչ է արել միավորվել վարակի դեմ պայքարում։
Երբ կնահանջի COVID-19-ը. Չինաստանի առաջատար համաճարակաբանը խոսել է համավարակի մասին
