ԵՐԵՎԱՆ, 16 ապրիլի – Sputnik. Վարչապետ Նիկոլ Փաշինյանը շնորհավորական ուղերձ է հղել ոստիկանությանը՝ մասնագիտական օրվա առիթով: Փաշինյանը ընդգծել է, որ ՀՀ ոստիկանությունը երկրում իրավակարգի պահպանության և պաշտպանության կարևորագույն ինստիտուտ է, և, որ համակարգում յուրաքանչյուրի աշխատանքի որակից է կախված ՀՀ քաղաքացիների քաղաքացիական ինքնազգացողությունը:
«Ձեզանից յուրաքանչյուրն ամեն օր շփվում է տասնյակ, հարյուրավոր մարդկանց հետ և իմ պատկերացումը և առաջադրանքը, որ դնում եմ ՀՀ ոստիկանության առաջ հետևյալն է. յուրաքանչյուր քաղաքացի ոստիկան տեսնելիս պետք է համակվի պաշտպանվածության զգացողությամբ, ոստիկանն իր գոյությամբ և ներկայությամբ պետք է բարձրացնի քաղաքացիների վստահության մակարդակը և վստահություն ներշնչի քաղաքացիներին»,- նշել է վարչապետը:
Նրա համոզմամբ՝ միայն այդ դեպքում հնարավոր կլինի էականորեն մեծացնել հասարակական կարգի պաշտպանության՝ մեր երկրում առկա մակարդակը, ուժեղացնել հանցավորության դեմ պայքարի, հանցագործությունների կանխմանը և նախականխմանը ուղղված մեր ջանքերի արդյունավետությունը:
Գյումրիում դանակով ոստիկանների վրա հարձակված վարորդն ու ուղևորը ձերբակալվել են․ ՔԿ
Փաշինյանը հույս է հայտնել, որ ոստիկանության համակարգված բարեփոխումների արդյունքում քաղաքացին անվերապահորեն կվստահի ոստիկանին, իսկ կառավարությունը միջոցներ կձեռնարկի ոստիկանությանը և նրա յուրաքանչյուր աշխատակցի անհրաժեշտ տեխնիկական և իրային միջոցներով, պատշաճ աշխատավարձով և սոցիալական երաշխիքների գործուն համակարգով ապահովելու համար:
Վարչապետը կարևորել է նաև օրենսդրական կարգավորումները, որտեղ ոստիկանության լիազորություններն ու պարտականությունները կլինեն հստակ ձևակերպված, որտեղ հստակ սահմանված կլինեն այն կարմիր գծերը, որից այն կողմ ոստիկանությունը չի կարող անցնել և իրավակարգի պաշտպանությունը, հանցավորության դեմ պայքարը չի կարող տեղի ունենալ ի հաշիվ մարդու և քաղաքացու իրավունքների:
«Ոստիկանությունը պետք է զերծ լինի կոռուպցիայից և առաջին հերթին ոստիկանությունը պիտի պայքարի իր ներսից կոռուպցիան արմատախիլ անելու համար: Սա է այն օրակարգը, որ մենք միասին պիտի իրականացնենք առաջիկա տարիների ընթացքում: Ոստիկանությունը կանգնած է համապարփակ բարեփոխումների շեմին, որոնց արդյունքում մենք ունենալու ենք էլ ավելի արդյունավետ գործող և արդի պահանջներին համապատասխանող ոստիկանություն»,- շեշտել է գործադիրի ղեկավարը:
Ամփոփելով խոսքը՝ Փաշինյանը, դրվատանքի խոսքեր է հնչեցրել կորոնավիրուսի համաճարակի պայմաններում ոստիկանների կատարած աշխատանքի համար, որտեղ ևս նրանք առաջնագծում են, և բոլորին մաղթել արժանապատիվ ու անփորձանք ծառայություն:
Գյումրիում ձևաթուղթ պահանջելու համար ոստիկաններին դանակահարել են
