ԵՐԵՎԱՆ, 15 ապրիլի – Sputnik. Վեհափառի հայտարարությանը քրեադատավարական ընթացակարգերի հետ որևէ աղերս չունի: Մեկնաբանելով Գարեգին 2–րդ Ամենայն Կայոց կաթողիկոսի դիմումը ՀՀ երկրորդ նախագահ Ռոբերտ Քոչարյանի խափանման միջոցը կորոնավիրուսի այս շրջանում փոխելու վերաբերյալ Sputnik Արմենիայի հետ զրույցում ասաց ՀՀ գլխավոր դատախազության մամուլի քարտուղար Արևիկ Խաչատրյանը։
«Մենք չենք մեկնաբանում կոնկրետ քրեական դատավարության գործընթացից դուրս նման հայտարարությունները»,–ասաց նա:
Անդրադառնալով նույն թեմայով Քոչարյանի պաշտպանների ներկայացրած միջնորդությանը` Խաչատրյանը նշեց, որ բազմիցս առիթ են ունեցել հստակ դիրքորոշում արտահայտելու Քոչարյանի խափանման միջոցի հարցի վերաբերյալ, համաձայն որի Ռ. Քոչարյանի խափանման միջոցի փոփոխության հիմքեր չեն տեսել:
«Դատական քննության ընթացքում մեղադրող դատախազները կծանոթանան պաշտպանության կողմի հիմնավորումներին և կհայտնեն իրենց դիրքորոշումը»,–ասաց նա:
Հիշեցնենք, որ երեկ` ապրիլի 14–ին, Ն․Ս․Օ․Տ․Տ․ Գարեգին Երկրորդ Ամենայն Հայոց Կաթողիկոսը դիմել էր ՀՀ 2–րդ նախագահ Ռոբերտ Քոչարյանի խափանման միջոցը փոխելու հարցով։ Կաթողիկոսը կարևորել է համավարակի տարածման շրջանում Քոչարյանի առողջական վիճակը հետագա բարդացումներից ապահովելու անհրաժեշտությունը:
Հիշեցնենք՝ ապրիլի 9–ին ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանը հայցադիմումներ էր ներկայացրել Վարչական և Ընդհանուր իրավասության դատարաններ ընդդեմ Քրեակատարողական ծառայության։
Պաշտպանական կողմը պահանջում էր կանխել իրավունքները խախտող գործողությունները, մասնավորապես՝ անմարդկային վերաբերմունքը և խոշտանգումները Ռոբերտ Քոչարյանի նկատմամբ:
Ռոբերտ Քոչարյանի գործում առկա է անմարդկային վերաբերմունք. ևս 1 միջնորդություն կներկայացվի
ՀՀ երկրորդ նախագահի պաշտպանական խմբի տեսանկյունից խնդիրն այն է, որ կա խափանման միջոցի հետ կապված միջնորդություն, ինչն առավել հրատապ է այս վիճակում, քանի որ առկա է անմարդկային վերաբերմունքի հետ կապված հարց։ Այսինքն` պահման պայմանների առթիվ պետք է հաշվի առնվի կորոնավիրուսի հետ կապված զարգացումները։
Ռոբերտ Քոչարյանի պաշտպանը երկրորդ անգամ է դիմել ՄԻՊ-ին
Նշենք, որ Ռոբերտ Քոչարյանի և մյուսների գործով դատավոր Աննա Դանիբեկյանին տրամադրված ժամանակավոր անաշխատունակության թերթիկի ժամկետը ներառյալ սույն թվականի ապրիլի 16-ն է, և եթե բուժող բժշկի կողմից այն չերկարաձգվի, դատավորն ապրիլի 17-ին կներկայանա աշխատանքի:
