ԵՐԵՎԱՆ, 15 ապրիլի – Sputnik. Արցախի նախկին վարչապետ Արայիկ Հարությունյանը, որը շուտով կստանձնի Արցախի չորրորդ նախագահի լիազորությունները, այսօր լրագրողների հետ հանդիպման ժամանակ Արցախի ժողովրդին Հայաստանի իշխանությունների շուրջ համախմբվելու կոչ արեց։
«Եթե ժամանակի ընթացքում իրավիճակը դրական փոփոխության չենթարկվի, ապա համաճարակը կդառնա տնտեսական ճգնաժամ, իսկ երկուսը միասին` ընդհանուր աղետ։ Մենք պետք է միավորվենք ոչ միայն Արցախում, այլև հայությամբ համախմբվենք Հայաստանի իշխանության շուրջ, քանի որ գլխավոր պատասխանատվությունը և խնդիրը Հայաստանի իշխանություններինն է, և մենք պետք է միասին լուծենք այդ խնդիրը»,-ասաց նա։
Հարությունյանի խոսքով ՝ Արցախում շարունակվելու է այն քաղաքականությունը, որը կհամախմբի հայ հասարակությանը։
Համախմբման համատեքստում նա նաև հայտարարեց, որ Արցախում ոչ ոքի նկատմամբ քաղաքական հետապնդում չի լինելու, թեև նախընտրական քարոզչության ժամանակ իր հասցեին եղել են այնպիսի հայտարարություններ, որ ցանկացել է դիմել դատարան, բայց այժմ մտափոխվել է։
Հարությունյանն իր հաղթանակը համարում է ժողովրդի հաղթանակը, քանի որ ընտրություններն անցկացվել են ծանր պայմաններում։ Նրա խոսքով` պատճառը ոչ միայն կորոնավիրուսն էր, այլ այն, որ քաղաքական ընդդիմախոսների մեծ մասը հատուկ բոյկոտել և քաղաքական երանգ է հաղորդել ընտրություններին` նախօրոք տեսնելով ընտրության ընթացքը, հասկանալով ընտրության արդյունքները։
Հիշեցնենք` մարտի 31–ին Արցախում կայացած նախագահական ընտրությունների առաջին փուլից հետո մրցապայքարում էին մնացել Հարությունյանն ու արտգործնախարար Մասիս Մայիլյանը։
Ապրիլի 14-ին անցկացվեց ընտրությունների երկրորդ փուլը, որի արդյունքում հաղթեց Արայիկ Հարությունյանը։ Բոլոր 282 ընտրատեղամասերի քվեաթերթիկների մշակման արդյունքում Հարությունյանի օգտին քվեարկել է 39 860 մարդ, Մայիլյանի օգտին ՝ 5 428:
Ընտրությունների առաջին փուլի արդյունքում նախկին վարչապետ (պետնախարար) «Ազատ Հայրենիք» կուսակցության ղեկավար Արայիկ Հարությունյանը ստացել է ձայների 49,26%-ը, արտգործնախարար Մասիս Մայիլյանը՝ 26,4%-ը։
