ԵՐԵՎԱՆ, 15 ապրիլի - Sputnik. Կառավարությունը քննարկում է չգազիֆիկացված համայնքների բնակիչների ծախսած էլեկտրաէներգիայի փոխհատուցման հարցը։ Տեղեկությունը հաղորդեց ՀՀ փոխվարչապետ Մհեր Գրիգորյանը` պատասխանելով հարցին, թե ի՞նչ են անելու 330 չգազիֆիկացված համայնքների 140 000 բնակիչները, քանի որ նրանք այս ընթացքում տունը ջեռուցել են միայն էլեկտրականությամբ։
«Արդեն իսկ աշխատանքային խումբ է ձևավորվել և քննարկվում է չգազիֆիկացված համայնքների հարցը։ Ընկերությունների հետ փորձում ենք ճշգրտել մարդկանց տվյալներն այնպես, որ օժանդակություն տրամադրենք»,–ասաց Գրիգորյանը։
Նրա խոսքով` պետք է այնպես անեն, որ ոչ թե այս կամ այն համայնքում ամառանոց ունեցողների էլեկտրաէներգիայի գումարը փոխհատուցեն, այլ մարդկանց, որոնք իրականում ունեն դրա կարիքը։
Գազի գնի բարձրացման խնդիրը լուծելու հարցում Փաշինյանն ակնկալում է Պուտինի միջամտությունը
Գրիգորյանը հայտնեց, որ սոցաջակցության միջոցառման բովանդակությունը կհրապարակվի առաջիկայում։
Հիշեցնենք, որ ապրիլի 14–ին ՀՀ կառավարությունը հաստատել էր կորոնավիրուսի տնտեսական հետևանքների չեզոքացման տասներկուերորդ միջոցառումը, որը վերաբերում է սոցիալական խնդիրների առջև կանգնած մի խումբ անձանց։
Միջոցառման շահառու են բնական գազի մատակարարման և էլեկտրական էներգիայի մատակարարման պայմանագիր կնքած այն բնակիչ բաժանորդները, որոնց 2020 թվականի փետրվար ամսվա ծախսը կազմել է բնական գազի սպառման գծով 10 հազար 1 դրամից մինչև 30 հազար դրամ, էլեկտրաէներգիայի սպառման գծով՝ 5 հազար 1 դրամից մինչև 10 հազար դրամ։
