ԵՐԵՎԱՆ, 14 ապրիլի — Sputnik. Հայտնի շոումեն, հումանիստ Գարիկ Մարտիրոսյանը, Instagram-ի իր էջում պատասխանելով հետևորդների հարցերին, կրկին խոսել է Հայաստանի և հայերի մասին։
Հարցին, թե Ռուսաստանի սահմաններից դուրս ուր խորհուրդ կտաք այցելել, Մարտիրոսյանը միանշանակ պատասխանել է`Երևան։ Հետևորդները կատակել են` եթե Հայաստանում այդքան լավ է, ինչո՞ւ են բոլոր հայերը Մոսկվայում։ Գարիկն իրեն չի կորցրել ու դիպուկ հումորային պատասխան է տվել։ «Որ Մոսկվայում էլ այնքան լավ լինի, որքան Հայաստանում»,-գրել է նա։
Իր զավակների հայերեն խոսել–չխոսելու մասին շոումենը կրկին հումորով է պատասխանել, ինչից պարզ չի դարձել` երեխաները տիրապետում են հայերենին, թե ոչ։ «Մշտապես հայերեն են խոսում։ Նույնիսկ քնած ժամանակ չեն լռում»։
Հետևորդներին նաև հետաքրքրել է, թե ըստ Գարիկի, որն է ամենածիծաղելի բառը հայերենով. «Ծծմբաթթու։ Համաձայնեք, ծիծաղելի բառ է»,- գրել է Գարիկը։
Հետևորդներից մեկը պահանջել է, որ Գարիկն ասի, թե հույներն ավելի լավն են, քան հայերը։ Գարիկն էլ, կարծես թե գլխի է ընկել, թե ով է խնդրանքի հեղինակը։ «Դեմիս, բավական է կեղծ էջերից գրես»,- պատասխանել է Մարտիրոսյանը։
Հարցին՝ չե՞ք ցանկանում դառնալ Հայաստանի նախագահ, Մարտիրոսյանը պատասխպանել է. «Դեռ ոչ, պարոն Զելենսկի»։ Գարիկը կատակել է, որ ամեն ինչ իր կյանքում ավելի լավ կստացվեր, եթե Սոֆիկոն եթերում չառաջարկեր նրան դառնալ ՀՀ նախագահ։
Ի՞նչ տեսք ունեին Գարիկ Մարտիրոսյանն ու նրա կինը 13 տարի առաջ. լուսանկար
«Հիմա էլ բոլորը կասեն, թե հայերի փոխարեն վրացիներն են ՀՀ նախագահ առաջադրում»,–կատակել է նա։
Հիշեցնենք, Գարիկ Մարտիրոսյանին ՀՀ նախագահ դառնալու «առաջարկ» էր արել ճանաչված հեռուստահաղորդավար, լրագրող Սոֆիկո Շևարդնաձեն «Просто о сложном» հաղորդաշարի եթերում։
Խորովածի փունջ նվիրի. Գարիկ Մարտիրոսյանը խորհուրդ է հարցրել ու զավեշտալի պատասխաններ լսել
Նշենք, որ Գարիկ Մարտիրոսյանը ծնվել է 1974 թվականին Երևանում: Ավարտել է Երևանի բժշկական համալսարանը` նյարդահոգեբան-հոգեթերապևտ որակավորմամբ։ Նա երեք տարի աշխատել է որպես բժիշկ: 1993 թվականից դարձել է Ուրախների և հնարամիտների ակումբի «Նոր հայեր» թիմի անդամ: Այդ ժամանակից ի վեր Մարտիրոսյանը սկսել է ակտիվ գործունեություն ծավալել ռուսական շոու բիզնեսում:
