ԵՐԵՎԱՆ, 14 ապրիլի – Sputnik. Ռուսաստանի արտգործնախարար Սերգեյ Լավրովը պերճախոս պատասխան է տվել կորոնավիրուսի համավարակի թեմայով Ռուսաստանին ու Չինաստանին ներկայացված մեղադրանքներին։ Նա հայտնի ասացվածքներ է հիշել։
Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Ժոզեֆ Բորելն ավելի վաղ ասել էր, որ Ռուսաստանն ու Չինաստանը Իտալիային օգնություն են ցուցաբերում, որպեսզի մեծացնեն իրենց աշխարհաքաղաքական ազդեցությունը։
«Մի քանի ասացվածք կա, օրինակ` ամեն մեկն իր արշինով է չափում։ Ով ինչ դարդ ունի, դրա մասին էլ խոսում է։ Սա` հումանիտար օգնությունը աշխարհաքաղաքական հակամարտության շահերին ծառայեցնելու մասով։ Ցավալի է, որ Բորելն ասել է այն, ինչ մեջբերեցիք։ Ցավալի է, որ մարդիկ լուն ուղտ են դարձնում, և, օրինակ, այն, ինչ իրականացվում է Իտալիայում, քիչ է մնում` ներկայացնեն որպես ներխուժում ՆԱՏՕ-ի ու ԵՄ-ի տարածք», - առցանց ճեպազրույցի ժամանակ ասել է Լավրովը լրագրողներին։
ՌԴ արտգործնախարարը նշել է, որ անթույլատրելի է համարում Չինաստանին կորոնավիրուսի հետ կապված բողոքներ ներկայացնելը։ Նրա խոսքով՝ որոշ երկրներում հնչած գաղափարներից մարդու «մազերը բիզ-բիզ են կանգնում»։
«Մենք դա տեսնում ու լսում ենք։ Դա էլ է ցավալի, որովհետև մեր չինացի ընկերները, որոնք հաղթահարել են համաճարակի պիկը և երկրի տնտեսությունը նորմալ հուն են վերադարձնում, իրենց մեջ չեն ամփոփվել։ Նրանք ամեն կերպ ձգտում են օգնել մյուս երկրներին իրենց փորձով, որը ստացել են ՉԺՀ-ում այդ չարիքի դեմ պայքարելու ընթացքում», - նշել է Լավրովը։
Ըստ ՌԴ արտգործնախարարի՝ պարկեշտության բոլոր սահմաններից դուրս են դատողություններն այն մասին, թե Չինաստանը պետք է բոլորին վճարի վարակի առաջացման համար։
Չինացիները, Արարատն ու բլոկադան. ՀՀ–ն կարող է համավարակի թեման օգտագործել Թուրքիայի դեմ
«Լսել եմ՝ Լոնդոնում արդեն մեկը հաշվել է, որ Չինաստանը համավարակի հասցրած վնասի համար 3 տրիլիոն 700 միլիարդ դոլար, թե եվրո է պարտք Եվրամիությանը։ Ոմանք էլ հայտարարում են, որ պետք է կալանքի տակ առնել արտասահմանում եղած չինական սեփականությունը, եթե Չինաստանը չվճարի այդ փոխհատուցումը։ Մազերս բիզ-բիզ են կանգնում, երբ նման բաներ եմ լսում։ Ու այդ ամենն ամենայն լրջությամբ ու հրապարակավ ասում են պաշտոնատար անձինք։ Անթույլատրելի եմ համարում, պետք չէ բոլորին սեփական արշինով չափել, որովհետև նման հայտարարությունները հիմնականում մեր արևմտյան գործընկերներից ենք լսում», - ընդգծել է նա։
Առողջապահության համաշխարհային կազմակերպությունը (ԱՀԿ) մարտի 11-ին հայտարարեց, որ Չինաստանում բռնկված COVID-19–ը համավարակի է վերածվել։
