ԵՐԵՎԱՆ, 14 ապրիլի - Sputnik. ԱՀ նախագահի թեկնածու, Արցախի նախկին վարչապետ Արայիկ Հարությունյանը քվեարկությունն ավարտելուց հետո պատասխանել է ընտրական գործընթացը լուսաբանող լրագրողների հարցերին, այդ թվում՝ կորոնավիրուսի տարածմամբ պայմանավորված իրավիճակի մասին:
«Իրավիճակը շատ ավելի բարդ է, քան մենք պատկերացնում ենք: Բայց ամենակարևորը՝ ՀՀ իշխանություններն ունեն կամք և վճռականություն, և միասին՝ համայն հայությամբ, մենք կարողանալու ենք ոչ միայն դիմակայել, այլև հաղթանակած դուրս գալ այս իրավիճակից: Միայն ժամանակ է պետք»,- ասաց Հարությունյանը:
Ընտրական գործընթացի պասիվությունը՝ ընտրությունների նախորդ փուլի համեմատ թեկնածուն բնական որակեց՝ հաշվի առնելով կորոնավիրուսի տարածմամբ պայմանավորված իրավիճակը:
Հարությունյանը շեշտեց, որ ներկա պահին պաշտոնապես հայտարարված հիվադացության ցուցանիշով Արցախում կորոնավիրուսային հիվանդության պանդեմիա չկա, հետևաբար, ԱՀ նախագահը արտակարգ դրություն հայտարարելու իրավական հիմք չուներ:
Արցախում կորոնավիրուսի նոր դեպք է հայտնաբերվել
Ըստ Հարությունյանի՝ սա է պատճառը, որ Բակո Սահակյանն Արցախում ոչ թե հատուկ դրություն, այլ հատուկ իրավիճակ է հայտարարել՝ հետևելով ԱՀ Սահմանադրության պահանջին:
Հարությունյանը հույս հայտնեց նաև, որ հիվանդության տարածման հետևանքով Արցախի տնտեսությունն աղետալի վիճակում չի հայտնվի:
«Աղետ կլինի, եթե այս իրավիճակը երկար տևի: Եթե գոնե 3-4 ամիս տևի, այդ ժամանակ շատ ավելի հեշտ կլինի: Իսկ եթե երկար տևի, մենք պետք է ամբողջությամբ վերանայենք մեր տնտեսությունը, մեր տնտեսության կառուցվածքը, և, համախմբվելով ՀՀ իշխանության շուրջը, մենք կարողանալու ենք պատվով դուրս գալ այս վիճակից»,- նշեց նա:
Հիշեցնենք՝ ԱՀ նախագահ Բակո Սահակյանի հրամանագրով Արցախում կորոնավիրուսի տարածումը կանխելու նպատակով հայտարարվել է արտակարգ իրավիճակ: Վերջին երկու օրերին Արցախում նոր թեստավորումներ չեն իրականացվել:
Վերջին տվյալներով՝ ԱՀ-ում կորոնավիրուսի վարակով հաստատված 6 քաղաքացի կա, որոնցից երեքի վիճակը գնահատվում է բավարար, երկուսինը՝ միջին ծանրության, մյուսի մոտ վարակին բնորոշ ախտանիշներ չկան:
Արցախում մարտի 31 –ին կայացած նախագահական ընտրությունների առաջին փուլի արդյունքում նախկին վարչապետ (պետնախարար) «Ազատ Հայրենիք» կուսակցության ղեկավար Արայիկ Հարությունյանը ստացել է ձայների 49,26%-ը, արտգործնախարար Մասիս Մայիլյանը՝ 26,4%-ը։
