ԵՐԵՎԱՆ, 13 ապրիլի – Sputnik. ՀՀ շրջակա միջավայրի նախարարությունը որոշել է հետաձգել 10 միլիոն ծառ տնկելու ծրագիրը, որը պետք է իրականացվեր այս տարի։
«Հաշվի առնելով նոր կորոնավիրուսի տարածման հետևանքով ստեղծված իրավիճակը, կարևորելով յուրաքանչյուրի առողջությունը, ինչպես նաև նկատի ունենալով հնարավոր ռիսկերը` որոշում ենք կայացրել սահմանված թիրախին հասնելու ժամկետը տեղափոխել 2021թ. վերջ»,– նշված է նախարարության տարածած հաղորդագրության մեջ։
Գերատեսչությունը լիահույս է, որ ստեղծված իրավիճակը կշտկվի և, այնուամենայնիվ, 2020թ. ընթացքում Հայաստանում կտնկվի 1.000.000 տնկի, որը նույնպես աննախադեպ է վերջին տարիների համար, իսկ արդեն 2021թ․ ամբողջությամբ կիրականացվի նախաձեռնությունը` տնկելով ևս 10.000.000 տնկի։
Ավելի վաղ ՀՀ վարչապետ Նիկոլ Փաշինյանը հայտարարել էր, որ մինչև 2020 թվականի հոկտեմբերի 10-ը Հայաստանում 10 մլն ծառ է տնկվելու: Վերջին 30 տարում Հայաստանում անտառները զգալիորեն տուժել են անխնա ծառահատումների պատճառով։ Նախորդ տարվա աշնանը վարչապետը կարգադրել էր ուշադիր հետևել անտառների պահպանությանը։
Հիշեցնենք` ՀՀ կառավարությունն այսօր հրավիրված արտահերթ նիստում միաձայն ընդունեց հանրապետությունում արտակարգ դրության ռեժիմը 30 օրով երկարաձգելու որոշումը։ Այն կտևի մինչև 2020 թվականի մայիսի 14-ը` ժամը 17:00-ն ներառյալ։
Հայաստանում կորոնավիրուսով վարակվածների թիվը հասել է 1039–ին։
