ԵՐԵՎԱՆ, 13 ապրիլի - Sputnik. IATA-ն ստեղծված իրավիճակում տոմսերի վերադարձը վաուչերներով փոխարինելը ճանաչել է օրինական գործընթաց, և «Արմենիա» ավիաընկերության գլխավոր տնօրենի տեղակալ Գևորգ Խաչատրյանը հույս ունի, որ ՀՀ կառավարությունը նույն քաղաքականությամբ կառաջնորդվի։
«Հուսով ենք, որ մեր կառավարությունը նույնպես կհետևի այս հորդորին և վաուչերները, որոնք տրամադրվում են այն ուղևորներին, որոնք չեն օգտագործել իրենց ավիատոմսը պանդեմիայի հետևանքով, օրինական ուժ կստանան: Հակառակ դեպքում տոմսերի վերադարձները, իսկ խոսքը գնում է միլիոնավոր դոլարների մասին, վերջնականապես ծնկի կբերեն հայկական փոխադրողներին»,– Facebook սոցցանցի իր էջում գրել է նա։
Խաչատրյանի խոսքով` նույն քաղականությունn որդեգրում նաև ՌԴ-ն, որտեղ ավիափոխադրողներն անհամեմատ կայուն ֆինանսական վիճակում են և տարիներ շարունակ իրենց կառավարությունից դոտացիաներ են ստանում։
Ի դեպ, «Արմենիա» ավիաընկերությունն այսօր հայտարարություն էր տարածել` հայտնելով, որ կորոնավիրուսային հիվանդության հետևանքով իրադարձությունների զարգացմամբ պայմանավորված՝ «Արմենիա» ավիաընկերությունը, մինչև մայիսի 15-ը ներառյալ, չեղարկում է բոլոր կանոնավոր չվերթերը։
Ընկերությունը հայտնում է, որ չեղարկված չվերթերի բոլոր ուղևորներին տրամադրվում է երաշխավորագիր (վաուչեր), առ այն, որ չօգտագործված ավիատոմսի գումարը համարվում է սառեցված «Արմենիա» ավիաընկերությունում և ենթակա է օգտագործման մեկ տարվա ընթացքում։
Մոսկվա-Երևան չարտերային չվերթով Հայաստան են վերադառնում 230 քաղաքացիներ
Հիշեցնենք, որ աշխարհի մի շարք երկրներում, այդ թվում՝ Հայաստանում, կորոնավիրուսի բռնկումը կանխելու նպատակով հաստատված արտակարգ դրության պայմաններում բազմաթիվ ավիաընկերություններ անորոշ ժամանակով դադարեցրել են դեպի Հայաստան և հակառակ ուղղություններով չվերթերը։
