ԵՐԵՎԱՆ, 11 ապրիլի — Sputnik. Երևանի քաղաքապետարանը 2000 տարեցի մեկ ամսվա պարենային և կենցաղային ապրանքներ է փոխանցել։ Կառավարության լրատվական կենտրոնում կայացած մամուլի ասուլիսի ժամանակ տեղեկությունը հաղորդեց Երևանի քաղաքապետի մամուլի խոսնակ Հակոբ Կարապետյանը։
«Քանի որ կորոնավիրուսի բռնկման իրավիճակն անկանխատեսելի էր և բյուջեում նախատեսված գումար չկար դրա համար, քաղաքապետարանը բյուջեի տողի վերաձևակերպում կատարեց` 45 մլն դրամ հատկացնելով սոցաջակցության համար։ Ծրագրի շահառուները միայնակ, անժառանդ տարեցներն են»,–ասաց Կարապետյանը։
Նրա խոսքով` աջակցության նպատակը տարեցների` տնից հնարավորինս քիչ դուրս գալն է։ Մասնագետների խորհրդով կազմվել են պարենի և կենցաղային այլ ապրանքների փաթեթներ, 2000 տարեցի 30 կգ–անոց արկղեր հանձնվել։
Ավագ սերնդի միայնակ արվեստագետներն անտեսված չեն. նրանց համար գնումներ են անում
Տարեցներին հանձնած պարենային արկղերում առկա մթերքների կալորիականությունը համարժեք է մեկ ամսվա սննդի կալորիականության պահանջին։
Կարապետյանը հայտնեց նաև, որ քաղաքապետարանի ողջ անձնակազմի պարգևավճարային ֆոնդից 130 մլն դրամ է փոխանցվել կորոնավիրուսի դեմ պայքարող 1800 բուժաշխատողի։
Հիշեցնենք, որ ՀՀ կառավարությունը նույնպես մշակել է աջակցության մի շարք ծրագրեր, որոնց միջոցով գումար է տրամադրվում աշխատանք չունեցող հղիներին, անչափահաս երեխա ունեցող ու գրանցված աշխատանք չունեցող ընտանիքներին, մինչև 14 տարեկան երեխա ունեցող ու մարտի 13-30–ն աշխատանքից ազատվածներին և այլն։
