ԵՐԵՎԱՆ, 11 ապրիլի — Sputnik. Ռուսաստանում Հայաստանի դեսպանությունը տեղեկացնում է, որ ապրիլի 12-ին (ժամը 15։40-ին) Մոսկվայի «Դոմոդեդովո» օդանավակայանից դեպի Երևան «Ռեդ Վինգս» ավիաընկերությունը կիրականացնի երրորդ չարտերային չվերթը (WZ4323)։
«Իրականացվելիք չարտերային չվերթով Հայաստան վերադարձող քաղաքացիների համալրվող ցուցակը պարբերաբար հրապարակվում է Facebook սոցիալական ցանցի դեսպանության էջում (@armembrus): Ցուցակագրված քաղաքացիները ապրիլի 12-ին (ժամը 12։00-ին) պետք է մոտենան «Դոմոդեդովո» միջազգային օդանավակայանի |25| - |30| հաշվառման սեղաններին՝ նստեցման կտրոնի ստացման և ուղեբեռի հանձնման նպատակով»,–նշված է հայտարարության մեջ։
Այս չվերթով Հայաստան վերադարձի առաջնահերթություն է տրվել այն ՀՀ քաղաքացիներին, որոնք Մոսկվա էին ժամանել այլ քաղաքներից Հայաստան մեկնելու նպատակով, բայց թռիչքների չեղարկման պատճառով չէին կարողացել մեկնել, նրանց, ովքեր այս օրերին գտնվում են դեսպանության կողմից տրամադրված հյուրանոցներում, ինչպես նաև մանկահասակ երեխաներ ունեցող ՀՀ քաղաքացիներին, մեծահասակներին, հետվիրահատական վերականգնման անհրաժեշտություն ունեցող և բուժման ցուցումով Հայաստան վերադարձողներին, ծայրաստիճան բարդ կացության մեջ հայտնվածներին:
Հիշեցնենք, որ Հայաստան վերադարձած ՀՀ քաղաքացիները ենթարկվելու են 14-օրյա պարտադիր կարանտինային ռեժիմի․ այն է՝ վերջիններս օդանավակայանից տեղափոխվելու են կարանտինային ռեժիմի համար նախատեսված հատուկ վայր:
Ապրիլի 3-ին հայտնի դարձավ, որ մի քանի տասնյակ ՀՀ քաղաքացիներ Մոսկվա-Երևան չվերթի չեղարկման պատճառով մնացել են «Դոմոդեդովո» օդանավակայում։
Ապրիլի 6-ին և 7-ին չարտերային չվերթով Ռուսաստանից Հայաստան է վերադարձել ավելի քան 400 քաղաքացի։ ՌԴ-ում ՀՀ դեսպանությունն ավելի վաղ հայտնել էր, որ Ռուսաստանից Հայաստան գալու համար ցուցակագրված քաղաքացիների թիվը գերազանցում է 2000–ը։
Դեսպան Տողանյանը հանդիպել է «Դոմոդեդովոյում» մնացած ՀՀ քաղաքացիների հետ
