ԵՐԵՎԱՆ, 10 ապրիլի- Sputnik. Խոշոր տնտեսվարող սուբյեկտների մոտ առկա պաշարների հետ կապված անհանգստություն չկա։ Այսօր կառավարության մամուլի կենտրոնում տեղի ունեցած ասուլիսի ընթացքում ՀՀ ՏՄՊՊՀ նախագահ Գեղամ Գևորգյանը նշեց, որ հանձնաժողովը շարունակում է ուսումնասիրել ոչ միայն առկա պաշարները, այլև գների դինամիկան։
Նա ընդգծեց, որ վերջին օրերի ընթացքում գների նվազման դինամիկա է նկատվում, բայց և հավելեց, որ դա չի նշանակում, թե արժեքները նույնն են դարձել փետրվարի համեմատությամբ։ Հանձնաժողովն ուսումնասիրությունները փետրվարի 26-ից է սկսել։
Գևորգյանը տեղեկացրեց, որ որոշ ցիտրուսային մրգերի գների բարձրացում կա. որպես օրինակ նշեց նարինջը, փոխարենը մանդարինն է 60 դրամով էժանացել, բայց դեռևս գինը հեռու է փետրվարի արժեքից, դա նաև բեռնափոխադրումների գործընթացի հետ է կապված։
Գներն իջնո՞ւմ են. ՏՄՊՊՀ նախագահը ներկայացրել է որոշ ապրանքների գների դիտարկումները
Իսկ տեղական արտադրանքների գների նվազումը, ըստ հանձնաժողովի նախագահի, պայմանավորված է նաև սեզոնային գործոնով, օրինակ` էժանացել են լոլիկը, վարունգը։
Վերջին մեկ-երկու օրերին նկատվող ապրանքների գնի նվազումը ՏՄՊՊՀ նախագահը նաև կապում է արտարժույթի նվազման հետ։
Նա նշեց՝ 2018 թվականի հետ համեմատական վերլուծություն է կատարվել ոչ թե այս օրերի թանկացումն արդարացնելու, այլ գների դինամիկան հասկանալու համար։ 2018 թվականին շաքարավազը եղել է 380 դրամ, կարագը 4650-4700 դրամ, նույնիսկ հասել է 4800-5000 դրամ, ձուն 60-70 դրամ է եղել։
«Եթե համեմատեք նույնիսկ 2020 գների բարձրացման հետ, կտեսնեք, որ գները բավականին նվազ են։ Սա նշանակում է, որ իսկապես մրցակցությունն աշխատում է»,- ասաց Գևորգյանը՝ չբացառելով, որ լինում են տնտեսվարողներ, որոնք չարաշահում են իրենց դիրքը։
Ինչ վերաբերում է չարչրկված ձվի գնին, Գևորգյանը նշեց՝ ձվի գնի դեմպինգի, այսինքն՝ ինքնարժեքից ցածր վաճառքի հետ կապված հանձնաժողովում վարույթ էր հարուցվել։
«Հիմա, երբ ձվի գինն արդեն 46, 47, 36 դրամ է, իսկ մեր հաշվարկով ինքնարժեքը պետք է լիներ 36 դրամ, այսինքն՝ անոմալ վիճակը սկսում է վերանալ»,- ասաց Գրիգորյանը՝ նշելով, որ հանձնաժողովը փոքր և միջին ձու արտադրողներից բազմաթիվ բողոքներ էր ստացել դեմպինգի վերաբերյալ։
Որքանով կազդի արտակարգ դրությունը գների վրա. ԿԲ-ի պարզաբանումը
«Պետք է օբյեկտիվ հարթության մեջ նայենք։ Ես հասկանում եմ, որ հնարավորինս մատչելի ապրանքը բոլորիս շահերից է բխում, բայց նույնիսկ էժան գինը պետք է տնտեսապես հիմնավորված լինի»,- նշեց Գևորգյանը՝ հավելելով, որ հանձնաժողովում մի շարք ապրանքային շուկաներում վարույթներ են հարուցվել, մասնավորապես՝ կարագ, շաքար, ձու, բենզին, դիզել, ևս մի քանի վարույթ էլ կհարուցվի ձեթի, հավի մսի, հավի բդի ապրանքային շուկաներում։
Հիշեցնենք՝ արտակարգ դրության օրերին ԶԼՄ-ներում ու սոցիալական կայքերում պարբերաբար ահազանգեր են հնչեցվում շուկայում տարբեր ապրանքատեսակների կտրուկ թանկացումների մասին:
