ԵՐԵՎԱՆ, 10 ապրիլի – Sputnik. ՀՀ բարձր տեխնոլոգիական արդյունաբերության նախարարությունը հանդես է եկել հայտարարությամբ, որով կոչ է արել ՀՀ կապի և հեռահաղորդակցության օպերատորներին ու դրանց աշխատակիցներին արտակարգ դրության պայմաններում ցուցաբերել բարձր պատասխանատվություն և ապահովել կապի ու հեռահաղորդակցության ծառայությունների անխափան աշխատանքը:
Անդրադառնալով «Յուքոմ» ՓԲԸ-ի կողմից «Վեոն Արմենիա» ՓԲԸ-ի բաժնետոմսերի ձեռքբերման մասին մամուլում տարածված լուրերին՝ նախարարությունը հիշեցրել է, որ «Էլեկտրոնային հաղորդակցության մասին» ՀՀ օրենքի համաձայն` այդ գործընթացը սկսելու համար ընկերությունները նախ պետք է ստանան Հանրային ծառայությունները կարգավորող հանձնաժողովի համաձայնությունը:
«Հարցը գտնվում է քննարկման փուլում, իրականացվում են ուսումնասիրություններ և վերլուծություններ»,- հայտնում է նախարարությունը:
Հիշեցնենք՝ ապրիլի 9–ին հայտնի դարձավ, որ Ucom ընկերության կառավարման ողջ օղակը՝ բոլոր տնօրենների գլխավորությամբ, ինչպես նաև տեխնիկական ողջ անձնակազմն աշխատանքից ազատվելու դիմումներ են գրել։
Ucom-ի և Beeline-ի միավորման վերաբերյալ ՏՄՊՊՀ-ն դեռ որոշում չունի
2019 թվականի դեկտեմբերի 30-ին Ucom-ը դիմել էր Հանրային ծառայությունները կարգավորող հանձնաժողով` «Վեոն Արմենիա» ընկերությունը (ապրանքանիշը «Beeline») գնելու նպատակով:
Մինչև 2015 թվականին Orange Armenia–ն ձեռք բերելը ընկերությունում աշխատել է մոտ 800 մարդ։ Դրանից հետո Ucom–ն ընդունել է Orange–ի աշխատակիցներին, և ընկերությունում սկսել է աշխատել 1200 մարդ։ Այսօր այդ թիվը 1600–ի է հասել։
