Նանա Մարտիրոսյան, Sputnik Արմենիա
Sputnik Արմենիայի խմբագրությունն անսովոր ահազանգ ստացավ։ Զանգահարեց մի անտուն տղամարդ, ոչինչ չխնդրեց, բարձրաձայնեց մի խնդիր, որը մեզ հետաքրքրեց։ Նախ, տղամարդը հայտնեց որ ԱԱԾ-ի աշխատակիցները նրանից վերցրել են անձնագիրը, իսկ ոստիկաններն ամեն քայլափոխի տուգանում են արտակարգ իրավիճակի խախտման և փաստաթղթերի բացակայության համար։ Ընդ որում, անտուն տղամարդն այդպես է չստացավ հարցի պատասխանը, որը թերևս հռետորական է․ ի՞նչ իմաստ ունի տուգանք գրել մարդուն, որը միևնույնն է երբեք չի կարողանա վճարել։
Մեր զրուցակիցը չբացառեց, որ կարող է կորոնավիրուսի կրող լինել, բայց ոչ ինքը, ոչ շրջապատողներն այդ մասին գլխի չեն ընկնում։ Մեր զրուցակիցը համոզված է, որ ստեղծված իրավիճակում պատասխանատու մարմինները պարտավոր են ուշադրություն դարձնել անտուններին, ալկոգել բաժանել նրանց, չափել ջերմությունը և ախտանիշների առկայության դեպքում մեկուսացնել։ Տղամարդն ինքը իրեն հանրության համար վտանգավոր է համարում, բայց չի պատկերացնում, թե ինչպես կարող է ձայնը հասցնել «վերևներին»։
«Մենք մարդկանց հետ անընդհատ շփման մեջ ենք, մեր հավաքած մանրադրամով գնումներ ենք կատարում, օգտվում ենք սուրճի ապարատներից, բնականաբար, հեշտությամբ կարող ենք տարածել վիրուսը, բայց մեզ վրա անգամ համավարակի պայմաններում ոչ ոք ուշադրություն չի դարձնում։ Եթե մտքովս անցնի վարակվել և, օրինակ, փողոցում փռշտալ պարետ Տիգրան Ավինյանի վրա, ոչ ոք ինձ չի կարողանա խանգարել»,-ասաց տղամարդը։
ԱԱՏՄ աշխատակիցների մոտ կորոնավիրուս է հայտնաբերվել. ավելի քան 30–ը մեկուսացված են
Ավելի վաղ մեր խմբագրությունն արդեն անդրադարձել էր անտունների խնդրին։ Այս անգամ որոշվեց գնալ զանգի հետքերով՝ դիմելով բոլոր գերատեսչություններին, որոնք ուղիղ կամ միջնորդավորված զբաղվում են անտունների հարցով։
Սկսեցինք փաստաթղթերի խնդրից։ Ազգային անվտանգության ծառայությունից հայտնեցին, որ լիազորված չեն փաստաթղթերը բռնագրավել և ամենայն հավանականությամբ տղամարդը նրանց շփոթել է ոստիկանների հետ։ Իսկ ոստիկանությունից էլ տեղեկացրին, որ անտուններին երբեք չեն տուգանում։ Ավելին՝ պարետատան համապատասխան հրահանգը ստանալուց հետո քաղաքապետարանին օգնում են տեղափոխել նրանց հատուկ ապաստարան, որտեղ նրանք կմնան համաճարակի ընթացքում։
«Ոստիկանությունն ու քաղաքապետարանի Սոցիալական ապահովության վարչությունը համագործակցում են անտունների հայտաբերման և համապատասխան հաստատություններ տեղափոխման հարցում։ Այս շրջանում խնդիրը լուծված է»,-հայտարարեց ոստիկանության պետի տեղակալ Հայկ Մհրյանը։
Փաստաթղթերի հարցն անհասկանալի մնաց, իսկ մեր անտունն այդ ընթացքում «կորավ»։ Նա անհասանելի է և մնում է միայն սպասել նրա հաջորդ զանգին։ Մենք չէինք ուզում սահամանափակվել միայն նրա պատմությունը ներկայացնելով, բայց պարզվեց, որ իրականում հիմա փողոցում անտուններ գտնելն այդքան էլ հեշտ չէ։ Համենայն դեպս կենտրոնական փողոցներում նրանց չհանդիպեցինք։
Հասկանալու համար, թե այնուամենայնիվ ինչպես են մեկուսացնում անտուն մարդկանց, մենք դիմեցինք քաղաքապետարան, որտեղից մեզ հայտնեցին, որ ՀԿ-ներից մեկի հետ համաձայնություն է կնքված ապաստարանի երկրորդ հարկը վերանորոգելու և անտուններին այնտեղ տեղավորելու մասին։
Պողո՜ս, քո ծնունդն է. բժիշկները շնորհավորում են մեկուսացված տղայի տարեդարձը. տեսանյութ
Երևանի քաղաքապետարանի տեղեկատվության և հասարակայնության հետ կապերի վարչության պետ Հովսեփ Կուբատյանի խոսքով՝ վերանորոգման աշխատանքները քաղաքապետարանն է իրականացնում, աշխատանքի և սոցիալական հարցերի նախարարությունը տրամադրում է հարկավոր պարագաները, ոստիկանությունն ապահովում է տեղափոխումը, իսկ առողջապահության նախարարությունը կորոնավիրուսի թեստ է անցկացնելու։
Աշխատանքի և սոցիալական հարցերի նախարարությունից իրենց հերթին հայտնեցին, որ խոսքը «Հանս Քրիստիան Կոֆոեդ» ֆոնդի ապաստարանի մասին է։ Այնտեղ արդեն 100 անտուն մարդ կա, որոնք կարանտինի մեջ են, և նրանց մոտ «նորեկների» տանելը նպատակահարմար չէ։ Հենց այդ պատճառով այդ շենքի երկրորդ հարկն արդեն նորոգված է, իսկ աշխատանքի և սոցիալական հարցերի նախարարությունը փակված ապաստարաններից մահճակալները այնտեղ է տեղափոխել։ Նոր հարկում 150 մարդ կարող է տեղավորվել։
«Քանի որ անտունները ռիսկի խմբում են, նրանց կգտնեն և կբերեն ապաստարան»,-ասաց նախարարության մամուլի քարտուղար Սոնա Մարտիրոսյանը։
«Հանս Քրիստիան Կոֆոեդ» ֆոնդի ղեկավար Շավարշ Խաչատրյանն ավելացրեց, որ վերանորոգումը գործնականաում ավարտված է, մնում է միայն սանհանգույցների մասն ավարտել։ Հաստատությունն ապահովված է անհրաժեշտ բոլոր պարագաներով, մինչև իսկ անկողնային սպիտակեղենով։ Նրա խոսքով՝ արդեն հաջորդ շաբաթվանից անտունները կկարողանան կորոնավիրուսից «պատսպարվել» ապաստարանում, սակայն այնտեղ մտնելուց հետո նրանք բոլորը երկշաբաթյան կարանտինի մեջ պետք է լինեն։
«Եթե իրավիճակը շատ բարդանա, հավանաբար բոլորին մեզ մոտ կբերեն»,-կարծում է նա։
Ընդհանուր առմամբ, հիմնվելով ստացված տեղեկությունների վրա` կարելի է ենթադրել, որ անտունների հարցը շուտով կլուծվի։ Բայց մինչ այդ նրանք կարող են հասցնել վարակվել կամ արդեն իսկ վարակվել են։ Կա նաև մեկ այլ վտանգ․ նորմալ գոյության հույսից զրկված մարդիկ կարող են սկսել գիտակցաբար վարակել քաղաքացիներին։ Նախկինում նման դեպքեր եղել են տարբեր երկրներում՝ ՄԻԱՎ վարակակիրների հետ կապված։ Իսկ մեր խմբագրությանը դիմած տղամարդը, ըստ էության, հենց այդ էր ակնարկում։
Աղավնաձորում մեկուսացվածներին ծափերով ու շքեղ ծաղկեփնջերով են տուն ճանապարհել. տեսանյութ
Իսկ մենք առայժմ կարող ենք խոստանալ, որ ձեռքը զարկերակին կպահենք և դեռ կվերադառնանք այս թեմային։
Նշենք, որ համաձայն աշխատանքի և սոցիալական հարցերի նախարարության տվյալների, որոնք հարցմանն ի պատասխան ստացվել են տեղական ինքնակառավարման մարմիններից, ՀՀ-ում 2019թ․-ի դրությամբ 300 անտուն մարդ կա։ Անապաստանների մեծ մասը խտացված են Երևանում՝ մոտ 283 մարդ, մյուսները մարզերում՝ Սյունիք, Վայոց ձոր և Տավուշ։ Մյուս մարզերում կա՛մ անտունների մասին տվյալներ չկան, կա՛մ տեղական ղեկավար–մարմինները հայտնում է նրանց բացակայության մասին։
