Քաղաքագետ, «Կովկաս» ինստիտուտի հայկական մասնաճյուղի տնօրեն Ալեքսանդր Մարկարովի դիտարկմամբ՝ ԵԱՏՄ ներսում առայժմ ավելի շատ խոսվում է ոչ թե գլոբալ պայքարի, այլ առանձին պետությունների կողմից իրականացվող գործողությունների մասին։ Այդուհանդերձ կորոնավիրուսային ճգնաժամը հերթական գլոբալ մարտահրավերն է, ուստի քննարկվող խնդիրներն ունեն ընդգրկուն բնույթ։
«Դա ոչ թե անհատական կամ էքսկլյուզիվ հարց է, այլ համաշխարհային բնույթ կրող խնդիր է, և դրա դեմ պայքարը նույնպես կարող է լինել համընդհանուր։ Եթե խոսում ենք միջոցների մասին ու անդրադառնում առողջապահական բնագավառին, ապա այստեղ գերնպատակը կորոնավիրոսի դեմ դեղամիջոցի հայտնագործումն է, ինչն ըստ էության կլինի պայքարի ամենաարդյունավետ միջոցը»,– Sputnik Արմենիայի հետ զրույցում ասաց քաղաքագետը։
Նրա կարծիքով` պանդեմիայի դեմ համատեղ պայքարի եղանակներից մեկը հումանիտար փոխօգնությունն է, թեև ներկայումս յուրաքանչյուր պետություն իր ներսում հիմնական ռեսուրսներն առաջնահերթ ուղղում է համավարակի դեմ պայքարին։ Ըստ այդմ` քաղաքագետն առանձնանցնում է երկու միտում. մեկը յուրաքանչյուր երկրում իրականացվող գործողությսւններն են, մյուսը` տարբեր մասշտաբներով իրականացվող միջպետական հումանիտար փոխօգնությունը, իսկ վերջինս իր հերթին ենթադրում է գլոբալ արձագանքներ ու համակարգված գործողություններ։
Պարենային որոշ ապրանքների և բժշկական պարագաների ներմուծման մաքսատուրքերը զրոյացվում են
Անդրադառնալով մասնավորապես Զոհրաբ Մնացականյանի ու Սերգեյ Լավրովի հեռախոսազրույցին, որի ընթացքում քննարկվել է նաև կորոնավիրուսի դեմ պայքարում անհրաժեշտ փոխգործակցության հարցը, քաղաքագետը շեշտեց այն հանգամանքը, որ հումանիտար փոխօգնության համատեսքստում կարևորվում է հատկապես երկու երկրների քաղաքացիների վերադարձի հարցը, ինչը դժվարանում է այն առումով, որ Հայաստանը ՌԴ–ի հետ չունի անմիջական սահման, այդ հարցում պետք է ներգրավել նաև Վրաստանին, իսկ օդային չվերթների սահմանափակումներն էլ առաջացնում են որոշակի լարվածություն։
«Հումանիտար փոխգործակցության էլեմենտներից մեկն առնչվում է հենց այդ խնդրին, մյուսը` ՌԴ կողմից Հայաստանին ցուցաբերված անմիջական օգնությանը։ Ռուսաստանն արդեն իսկ այստեղ է գործուղել իր մասնագետներին, ուղարկել է նաև լաբորատորիա, որը թույլ կտա իրականացնել լրացուցիչ թեստավորում, վաղաժամ ախտորոշում և կլինի կորոնավիրուսի տարածման դեմ պայքարի լրացուցիչ միջոց»,– ընդգծեց քաղաքագետը։
Նրա գնահատմամբ` վերոհիշյալ երկու տարրերն ըստ էության ամենաառանցքային են երկու երկրների փոխգործակցության համապատկերում։
Հիշեցնենք՝ Հայաստանի և Ռուսաստանի արտաքին գործերի նախարարներ Զոհրաբ Մնացականյանն ու Սերգեյ Լավրովը երեկ հեռախոսազրույց են ունեցել, որի ընթացքում քննարկել են կորոնավիրուսի տարածումը կանխարգելող հարցեր։
