ԵՐԵՎԱՆ, 8 ապրիլի – Sputnik. Չինաստանի նախագահ Սի Ծինփինը ՀՀ նախագահ Արմեն Սարգսյանին նամակ է գրել և ասել, որ պատրաստ է համատեղ ջանքեր գործադրել և աջակցություն ցուցաբերել երկու ժողովուրդների կյանքն ու առողջությունը պաշտպանելու համար։ Տեղեկությունը հայտնում է նախագահի մամուլի ծառայությունը։
«Չինաստանն ու Հայաստանը բարեկամական գործընկերություն և համագործակցություն ունեցող երկրներ են: Առանձնահատուկ ուշադրություն հատկացնելով երկու երկրների հարաբերությունների զարգացմանը՝ պատրաստ եմ Ձեզ հետ համատեղ ջանքեր գործադրել մեր երկու երկրների առողջապահական ոլորտներում համագործակցության ամրապնդման համար»,– իր նամակում ասել է Սի Ծինփինը։
Չինաստանի նախագահն ասել է, որ չինական կողմը վճռականորեն պաշտպանում է կորոնավիրուսի համավարակի դեմ պայքարում Հայաստանի ջանքերը և պատրաստ է հետագա աջակցություն ցուցաբերել:
Նախագահ Սարգսյանն առաջիկայում մտադիր է շարունակել Չինաստանի նախագահի հետ քննարկումներն ու երկխոսությունը:
Հիշեցնենք` օրերս Արմեն Սարգսյանը նամակ էր հղել Չինաստանի նախագահին և բարձր գնահատել նոր կորոնավիրուսի համավարակի դեմ պայքարում այդ երկրի արձանագրած առաջընթացը:
