ԵՐԵՎԱՆ, 7 ապրիլի – Sputnik. Հայաստանն ինքնաթիռ է ուղարկել Չինաստան՝ այդ երկրից գնած թոքերի արհեստական շնչառության սարքեր ու կորոնավիրուսի տասնյակ հազարավոր թեստեր բերելու համար։ Այս տեղեկությունը Sputnik Արմենիային հայտնել են պարետատանը։
Մարտի 31-ին ՀՀ առողջապահության նախարար Արսեն Թորոսյանը հայտնել էր, որ առաջիկա օրերին ՀՀ առողջապահական համակարգը համալրվելու է նոր սարքավորումներով, մասնավորապես՝ ձեռք են բերելու 100 շնչառական ապարատ, 60 հազար թեստ, նաև բժշկական այլ պարագաներ՝ դիմակներ, բժշկական հատուկ հագուստ, ակնոցներ։
«Ինքնաթիռն այսօր է մեկնել, կվերադառնա վաղը կամ վաղը չէ մյուս օրը։ Այն կբերի Չինաստանից գնված բժշկական սարքավորումներն ու պարագաները», - նշեցին պարետատանը։
Հենց այս չվերթով են Հայաստան բերվելու Թորոսյանի նշած 100 շնչառական ապարատը, 60 հազար թեստը, նաև դիմակները, բժշկական հատուկ հագուստը, ակնոցները։
Աշխարհում COVID-19–ով վարակվածների ընդհանուր թիվն անցավ 1.3 մլն–ից
Հիշեցնենք՝ այսօրվա դրությամբ Հայաստանում կորոնավիրուսով վարակվածների թիվը կազմում է 853 մարդ։ Վտանգավոր վարակից բուժվել է 87 մարդ, մահացել՝ 8-ը։
Հայաստանում մարտի 16-ից ապրիլի 14-ը կորոնավիրուսի տարածման դեմ պայքարի շրջանակում արտակարգ դրություն է հայտարարվել։ Ապրիլի 1-ից արտակարգ դրության ավելի խիստ միջոցներ են կիրառվում։
Սահմանափակվել է երկիր մուտքն ու ելքը, Երևանում և մյուս քաղաքներում արգելվել են հանրային միջոցառումները, փակվել են մի շարք ռեստորաններ, սրճարաններ և խանութներ (բացի պարենայինից)։ Փակ են նաև ուսումնական և մշակութային հաստատությունները։
Օտարերկրացիների մուտքը ՀՀ արգելվում է. ո՞ւմ չի վերաբերում որոշումը
