ԵՐԵՎԱՆ, 7 ապրիլի– Sputnik. ՀՀ քննչական կոմիտեն տեղեկացնում է, որ Վայոց Ձորի Գլաձոր համայնքի բնակիչը ապրիլի 5-ի երեկոյան սպանության փորձ է կատարել համագյուղացու նկատմամբ` նրա ուղղությամբ կրակոցներ արձակելով։
«2020թ. ապրիլի 5-ին՝ ժամը 23:30-ի սահմաններում, «Եղեգնաձորի բժշկական կենտրոնից» ահազանգ է ստացվել, որ հրազենային վնասվածքով իրենց մոտ է տեղափոխվել Գլաձոր գյուղի 30-ամյա բնակիչը: Պարզվել է, որ ապրիլի 5-ին՝ ժամը 23:00-ի սահմաններում, Գլաձոր գյուղի գյուղամիջյան ճանապարհին տուժողը և նրա համագյուղացին նախկինում ունեցած անձնական լարված հարաբերությունների պատճառով վիճաբանել են, որին մասնակցել են նաև նրանց կողմնակիցները»,–նշված է հաղորդագրության մեջ։
Նրանց վիճաբանությունը վերածվել է կռվի, որի ընթացքում Գլաձոր համայնքի բնակիչը, կյանքից ապօրինաբար զրկելու դիտավորությամբ, ապօրինի կերպով ձեռք բերված հրազենից կրակոցներ է արձակել 30-ամյա երիտասարդի ուղղությամբ։ Սակայն իր կամքից անկախ հանգամանքներում կրակողը չի կարողացել հանցագործությունն ավարտին հասցնել և երիտասարդին պատճառել է միայն հրազենային վնասվածք:
Արտառոց դեպք Տավուշում. անտառապահը կացնով կտրել է համագյուղացու ականջը
Դեպքի առթիվ ՀՀ քննչական կոմիտեի Վայոց ձորի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի (սպանության փորձ) 1-ին մասով և 235-րդ հոդվածի (ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասով:
Որոշում է կայացվել Գլաձոր համայնքի բնակչին ձերբակալել։ Նախաքննությունը շարունակվում է:
