ԵՐԵՎԱՆ, 6 ապրիլի – Sputnik, Արմենուհի Մխոյան. «Գյումրի» բժշկական կենտրոնի տնօրեն Արմեն Իսահակյանը վստահեցնում է` իրենք գործել են ըստ օրենքի, երբ իրենց մոտ են ընդունել այն տղամարդուն, որն այս գիշեր մահացել է Երևանի «Գրիգոր Լուսավորիչ» հիվանդանոցում։ Նա Sputnik Արմենիային հայտնեց, որ տղամարդը իրենց մոտ ընդունվել է երկկողմանի թոքաբորբով, նրան զննել են նաև Գյումրու ինֆեկցիոն հիվանդանոցում, փաստացի նրա մոտ էպիդեմիոլոգիական անամնեզ չի եղել․ այսինքն՝ արտերկրում չի եղել, վիրուսակրի հետ չի շփվել և այլն։ Այս ամենից հետո իրենք նոր միայն ընդունել են հիվանդին՝ ապահով լինելով, որ վարակակիր չէ։
Ավելի վաղ տեղեկացրել էինք` կոնոնավիրուսի ախտանիշով մահացած 68–ամյա բնակիչը, մինչ Երևանի «Գրիգոր Լուսավորիչ» հիվանդանոց տեղափոխվելը, բուժում է ստացել Գյումրու բժշկական կենտրոնում, որն ընդգրկված չէ կորոնավիրուսով վարակվածներին բուժող հաստատությունների ցանկում։ Հիվանդը դիմել է ինֆեկցիոն հիվանդանոց, այնտեղից էլ տեղափոխվել «Գյումրու» ԲԿ: Քաղաքացուն հիվանդանոցում բուժել են՝ չիմանալով վարակի մասին: Տղամարդու հետ շփում ունեցած «Գյումրի» բժշկական կենտրոնի 29 աշխատակցի մեկուսացրել են քաղաքի հյուրանոցներից մեկում:
«Հիվանդանոցը գործել է ըստ օրենքի: Կա 35Ն հրաման, որի համաձայն` տեղեկացվում է համաճարակաբանին, որ կենտրոն է տեղափոխվել է բարձր ջերմությամբ, թոքաբորբով քաղաքացի։ Տղամարդու մոտ ախտորոշվել է նաև ուղեղի արյան շրջանառության խանգարում` ինսուլտ: Լինելով բազմապրոֆիլ հիվանդանոց և ճշտելով, որ մենք կարող ենք նրան ընդունել որպես սովորական հիվանդի` նրան ընդունել ենք»,- ասաց Իսահակյանը:
Տնօրենը վստահեցրեց, որ ինչպես մինչ այս, այդպես էլ հիմա հաստատությունում պարտադիր օրական 2 անգամ ախտահանում է կատարվում:
«Հենց այդ կանխարգելիչ միջոցառումները հաշվի առնելով` մտածում ենք, որ մեր բուժաշխատողները վարակված չպետք է լինեն և այս պահի դրությամբ, փառք Աստծո, նրանք իրենց լավ են զգում և անհանգստացնող խնդիր չկա:
Ինչպես այս հիվանդի ընդունումը, այնպես էլ բուժանձնակազմի մեկուսացումն իրականացվել է ըստ չափորոշիչների»,- ասաց Իսահակյանը։
Նրա խոսքով` եթե մեկուսացված բուժանձնակազմի անդամների մոտ ի հայտ գան կասկածելի նախանշաններ, կթեստավորվեն, եթե ոչ, ապա մեկուսացումից 14 օրը անց կվերսկսեն իրենց բնականոն աշխատանքը:
Ի դեպ, մեկուսացված 29 քաղաքացուց 7–ը բժիշկներ են, մյուսները` կենտրոնի տարբեր աշխատակիցներ՝ ընդունարանի աշխատակցից մինչև խորհրդատու, հետազոտող տեխնիկ և այլն, այսինքն` բոլոր նրանք, ովքեր մոտ են գտնվել հիվանդին 1 մետր հեռավորության վրա:
«Մեր 400 հոգանոց կոլեկտիվը, բացառությամբ տարեցների ու հեռահար աշխատողների, շարունակում է աշխատել»,– ասաց տնօրենը:
Նշենք, որ «Գյումրի» բժշկական կենտրոնը շարունակում է անհետաձգելի բուժօգնություն ցուցաբերել, այս պահին 60 բուժվող հիվանդ կա։
Այս պահի դրությամբ էլ «Գյումրի» ԲԿ-ում թեստավորում չի իրականացվում. ըստ չափորոշիչի` եթե համաճարակաբանը գտնում է, որ պետք է հաստատություն բերված հիվանդին իրականացվի թեստավորում, հիվանդը հատուկ շտապօգնության մեքենայով տեղափոխվում է կորոնավիրուսով հիվանդ մարդկանց համար նախատեսված բուժհաստատություն:
Հիշեցնենք` Հայաստանում կորոնավիրուսով վարակվածների թիվը հասել է 833-ի։
