ԵՐԵՎԱՆ, 6 ապրիլի- Sputnik. ՀՀ փոխվարչապետ, արտակարգ դրության պարետ Տիգրան Ավինյանի նոր որոշմամբ որոշակի փոփոխություններ են կատարվել գործատուի կողմից տրամադրվող տեղեկանքում։ Ըստ այդ որոշման՝ տեղեկանքում պետք է նշվի հարկ վճարողի հաշվառման համարը՝ ՀՎՀՀ–ն, ինչպես նաև ընկերության հասցեն և հեռախոսահամարը։
Նշենք, որ նոր տարբերակն ուժի մեջ է մտնում ապրիլի 8-ին՝ ժամը 23:59-ին:
Պարետի նոր որոշմամբ՝ այսուհետև առողջ ապրելակերպի սիրահարները կարող են ֆիզիկական վարժություններ կատարել կամ հեծանվավարել միայն առավոտյան ժամերին՝ 6-10-ը։
Հիշեցնենք, որ Հայաստանում կորոնավիրուսի տարածման կանխարգելման նպատակով մարտի 16-ից ապրիլի 14–ը սահմանվել է արտակարգ դրություն։
Պարետ Տիգրան Ավինյանի որոշմամբ՝ մինչև ապրիլի 12-ը գործում են արտակարգ ռեժիմի խստացման պայմաններ. չի աշխատում հասարակական տրանսպորտը, 39 տարվա մեջ առաջին անգամ գործունեությունը դադարեցրել է Երևանի մետրոպոլիտենը: Քաղաքացիները տնից դուրս գալ կարող են միայն ծայրահեղ անհրաժեշտության դեպքում՝ իրենց հետ ունենալով անձը հաստատող փաստաթուղթ և հատուկ ձևաթուղթ:
Ապրիլի 6–ի դրությամբ Հայաստանում կորոնավիրուսով վարակվածների թիվը հասել է 833-ի։
