ԵՐԵՎԱՆ, 5 ապրիլի - Sputnik. Մարտի 25-ից Հայաստանում կիրառված`անձանց տեղաշարժի իրավունքի և տնտեսական գործունեության մի շարք տեսակների ժամանակավոր սահմանափակումների շնորհիվ կառավարությանը հաջողվել է նվազեցնել վարակի տարածման ինտենսիվությունը։
Այս մասին Facebook-ի իր էջում գրել է ՀՀ փոխվարչապետ, պարետ Տիգրան Ավինյանը։
Նա նշել է, որ եթե մարտի 25-ից մեկ շաբաթ առաջ Հայաստանում 1 վարակակիրը վարակում էր 2 անձի, ապա այժմ այդ ցուցանիշը հաջողվել է նվազեցնել մինչև 1,4-ի:
«Առաջիկա շաբաթվա ընթացքում մեր խնդիրը պետք է լինի խստագույնս հետևել արտակարգ դրության ռեժիմի կանոններին ու սահմանափակումներին: Պետք է ձգտենք Rt-ն հնարավորինս նվազեցնել՝ այն հասցնելով 1-ից ցածր արժեքի: Սա կնշանակի, որ կորոնավիրուսային վարակի տարածումը կառավարելի է, իսկ առողջապահական համակարգը կկարողանա արդյունավետ սպասարկել հնարավոր ծանր դեպքերը: Այս ամենի արդյունքում կկարողանանք հետզհետե թեթևացնել սահմանափակումները ու աստիճանաբար վերադառնալ բնականոն կյանքի»,– գրել է Ավինյանը:
Փոխվարչապետը կոչ է արել առաջիկա շաբաթվա ընթացքում լինել առավել կարգապահ` այդպիսով սեփական ներդրումն ունենալով վարակի տարածումը կանխարգելելու գործում:
Հիշեցնենք, որ կորոնովիրուսի տարածման կանխարգելման համար Հայաստանում մարտի 16-ից ապրիլի 14–ն արտակարգ դրություն է սահմանվել։
Պարետ Տիգրան Ավինյանի որոշմամբ՝ մինչև ապրիլի 12-ը գործում են արտակարգ ռեժիմի խստացման պայմաններ. չի աշխատում հասարակական տրանսպորտը, 39 տարվա մեջ առաջին անգամ գործունեությունը դադարեցրել է Երևանի մետրոպոլիտենը: Քաղաքացիները տնից դուրս գալ կարող են միայն ծայրահեղ անհրաժեշտության դեպքում՝ իրենց հետ ունենալով անձը հաստատող փաստաթուղթ և հատուկ ձևաթուղթ:
