ԵՐԵՎԱՆ, 5 ապրիլի – Sputnik. Հայաստանում, բացառապես հայ մասնագետների աշխատանքի արդյունքում ստեղծվել է Covid-19 Armenia բջջային հավելվածը, որը փոխարինելու է արդեն տարածված AC19 հավելվածին։ Այս մասին հայտնում է ՀՀ փոխվարչապետ, պարետ Տիգրան Ավինյանը` Facebook-ում կատարած գրառմամբ։
«Հավելվածի ամենակարևոր կետը օգտատիրոջ բժշկական թեստավորումն է: Մի շարք հարցերի պատասխանների արդյունքում համակարգը գնահատում է Ձեր առողջական վիճակը և անհրաժեշտության դեպքում խորհուրդ տալիս, թե ինչ քայլեր ձեռնարկել»,– գրում է Ավինյանը։
Նրա խոսքով` թեստավորման շնորհիվ ռիսկի գոտում հայտնված օգտատերերի հետ կապ կհաստատեն պարետատան համաճարակաբանները և կանցկացնեն հարցազրույց, որի արդյունքում կորոշեն, թե արդյոք անձը կարիք ունի հետագա բուժզննման:
«Կարևոր է խուսափել սխալ տվյալներ մուտքագրելուց, որպեսզի բժիշկները կապ հաստատեն իրապես օգնության կարիք ունեցողների հետ»,– զգուշացնում է պարետը:
Covid-19 Armenia-ն բազմաֆունկցիոնալ է ու ներառում է նաև վերջին նորությունները կորոնավիրուսի դեմ պայքարի մեր գործողությունների վերաբերյալ, առողջապահական խորհուրդներ տարբեր իրավիճակներում վարակից զերծ մնալու մասին, կորոնավիրուսի հետ կապված վերջին վիճակագրությունը և այլն:
«Կարող է պատահի` մեզ հետևում են». ի՞նչ է ասում Ավինյանի խոսնակը նոր հավելվածի մասին
Հավելվածը ներառում է նաև տեղաշարժման թերթիկի էլեկտրոնային տարբերակը: Covid-19 Armenia-ն աշխատում է Android ու iOS համակարգով հեռախոսներում և հասանելի է և https://apps.apple.com/am/app/covid-19-armenia/id1505830061 հարթակներում:
