ԵՐԵՎԱՆ, 4 ապրիլի – Sputnik. Facebook–ի հայկական տիրույթում այսօր առավոտից օգտատերերը լուսանկարներ և տեսանյութեր են հրապարակում Հայաստանի տարբեր վայրերից` նշելով, որ «պառվի ուլերի» մեղքով Երևանի փողոցներում անձրևային շատրվաններ են առաջացել, իսկ մարզերում տեղումներն ավելի են «բարկացել», ու անձրևին փոխարինել է ձյունը:
Օրինակ ՝ Երևանի Սևանի փողոցում ջրահեռացման համակարգի և կոյուղատարերի խցանման պատճառով միանգամից մի քանի շատրվաններ են գոյացել։
Իսկ Գեղարքունիքի մարզի Գեղհովիտում գյուղում առատ ձյուն է տեղացել։ Լուսանկարը հրապարակել է ՀՀ ԱԻՆ «Հիդրոմետ» ծառայության պետ Գագիկ Սուրենյանը։
«Խնդրեմ, սա էլ պառավի փախնելու արդյունքը»,–լուսանկարին կից կատակել է Սուրենյանը։
Մարզերում բնակվողներն էլ լուսանկարներ են հրապարակել սեփական բակերից։
«Ջերմուկում էլ է ձյուն տեղում»,– գրել է մեկը։
Ձյունառատ լուսանկար կա նաև Գավառից։
Սուրենյանն անդրադարձել է նաև Երևանի հորդառատ անձրևին։
«Ի՞նչ էիք կռիվ անում երեկվա Թբլիսիի փողոցների լվացման համար։ Մենք այսօր սաղ հանրապետությունը անմնացորդ լվացինք»,–գրել է նա։
Այս գրառմանը հաջորդել են կատակները. «Հա, բայց ով աղային կուտակումներ ունի, կսկսի «ճռճռալ», «մեզ մոտ ամեն ինչ բնական է, թող նրանց բյուջեն ճեղքվի»,– գրել են օգտատերերը։
Երևանի աղբահանության աշխատակիցներն անձնական պաշտպանության միջոցներ են ստացել
Ժողովրդական զրույցի համաձայն` մի աղքատ կին, որ հաշվել էր ձմռան օրերը, գիժ մարտը ճանապարհելուց և ապրիլյան առաջին արևները տեսնելուց հետո ուլերին սար է հանում` ասելով. «Գնացին ձմռան ցուրտ օրերը, եկան տաք օրեր, ուլերս սարը տանեմ ու խոտ արածեցնեմ»: Եղանակն էլ բարկանում է, ու հենց պառավն ուլերին սար է հասցնում, մի քանի օր շարունակ հորդառատ անձրևներ է բերում պառավի և ուլերի գլխին, և ուլերը կոտորվում են: Ու հենց այդ օրվանից հովիվները դաս են քաղել ու ոչխարները գոմերից հանում են ապրիլի վերջին` «պառվի ուլերը» ավարտվելուց մի շաբաթ անց: «Պառվի ուլեր» է համարվում ապրիլի 1-16-ն ընկած ժամանակահատվածը:
Հայաստանում գտնվող ՌԴ քաղաքացիներն առայժմ չեն կարող մեկնել երկրից. ի՞նչ պետք է անեն նրանք
