ԵՐԵՎԱՆ, 3 ապրիլի – Sputnik. ՀՀ երկրորդ նախագահ Ռոբերտ Քոչարյանը ստացիոնար բուժում ստանալուց հետո այսօր դուրս է գրվել «Էրեբունի» բժշկական կենտրոնից և տեղափոխվել «Երևան Կենտրոն» քրեակատարողական հիմնարկ: Տեղեկությունը հայտնում է նրա փաստաբանական թիմը։
«Բժիշկները նրա առողջական վիճակում դինամիկա են արձանագրել, սակայն փաստել են, որ Ռոբերտ Քոչարյանն այս պահին բժշկի մշտական վերահսկողության և հետագա բուժման կարիք ունի»,– նշված է հաղորդագրության մեջ։
Փաստաբանական թիմը քննարկում է ստեղծված համաճարակային իրավիճակում Ռոբերտ Քոչարյանին ՔԿՀ տեղափոխելու նպատակահարմարության և նրա առողջության անվտանգության հարցը։ Այս պահին նաև առկա է բժշկական փաստաթղթերի ուսումնասիրության անհրաժեշտությունը։
«Արդեն իսկ հայտնի է, ՔԿ համակարգում առկա են կորոնավիրուսային վարակի հաստատված դեպքեր, իսկ թեստեր բավարար չափով չեն հանձնվում։ Հաշվի առնելով այդ, պաշտպանները գտնում են, որ նման պայմաններում Ռոբերտ Քոչարյանի առողջական վիճակը թույլ չի տալիս, որ նա պահվի ՔԿՀ-ում, որտեղի աշխատակիցները դեռ չեն հանձնել կորոնավիրուսի թեստը։ Հարկ ենք համարում ընդգծել, որ Փաստաբանական թիմը Ռոբերտ Քոչարյանի առողջական վիճակին վերաբերող մանրամասն տեղեկատվություն՝ բժշկական եզրակացություն, ստացած բուժում, չի հրապարակելու, քանի որ դա խիստ անձնական տեղեկություն է և բժշկական գաղտնիք»,– գրված է փաստաբանների հայտարարության մեջ։
Ռոբերտ Քոչարյանը կալանավայրից «Նաիրի» բուժկենտրոն էր տեղափոխվել մարտի 7-ին, մարտի 8-ին «Նաիրի» ԲԿ-ից նրան տեղափոխել էին «Էրեբունի» բուժկենտրոն։ Մարտի 10-ին նշանակված դատական նիստին դատավոր Աննա Դանիբեկյանը հայտնել էր, որ «Էրեբունի» ԲԿ-ից տեղեկանք են ստացել, որ Ռոբերտ Քոչարյանի մոտ, ի թիվս այլնի, ախտորոշվել է սրտի ռիթմի խանգարում, 3-րդ աստիճանի զարկերակային հիպերտենզիա:
