ԵՐԵՎԱՆ, 3 ապրիլի – Sputnik. Գեղարքունիքի մարզի Սոթք գյուղում 12-ամյա երեխա է ինքնասպան եղել։ Տեղեկությունը Sputnik Արմենիայի հետ զրույցում հաստատեց ՀՀ ոստիկանության լրատվության վարչության ԶԼՄ-ների հետ կապի բաժնի պետ Զարզանդ Գաբրիելյանը։ Նա հայտնեց, որ ոստիկանության Վարդենիսի բաժնում դեպքի վերաբերյալ հաղորդում են ստացել ապրիլի 2-ին՝ ժամը 11.15-ին, բժշկական կենտրոնից։ ԲԿ-ից հայտնել են, որ Սոթք գյուղում 12 տարեկան երեխա է կախվել:
«Սոթք գյուղի բնակիչներից մեկն օպերատիվ-քննչական խմբին հայտնել է, որ նույն օրը՝ ժամը 10:30-ի սահմաններում, 2007 թ.ծնված տղային տեսել է իրենց գոմի մուտքի դռան մոտ գտնվող երկաթյա ձողից հակի թելով կախված վիճակում: Հանգամանքները պարզվում են»,- ասաց Գաբրիելյանը։
Սոթքի համայնքապետ Հակոբ Ավետյանն էլ Sputnik Արմենիայի հետ զրույցում ասաց, որ դեպքի պահին երեխաները տանն են եղել, խաղացել են։
«Հայրն ու մայրը պայմանագրային զինծառայողներ են, նրանք այդ պահին եղել են աշխատավայրում։ Լավ ընտանիք է, որևէ խնդիր չի եղել։ Երեք տղա ունեն։ Մահացածն ավագ որդին էր։ Թե ինչու է երեխան ինքնասպանություն գործել, հայտնի չէ, այս պահին հստակ պատճառ չեմ կարող ասել»,– նշեց նա։
Ավետյանը չբացառեց, որ տղան կարող էր այդ քայլին դիմել համակարգչային խաղերի ազդեցության տակ։
