ԵՐԵՎԱՆ, 3 ապրիլի – Sputnik․ Առողջապահության նախարար Արսեն Թորոսյանը Facebook-ի ուղիղ եթերում ցուցադրեց «Նորք» ինֆեկցիոն հիվանդանոցի նոր կառուցված մասնաշենքը։ Նախարարը շրջեց մասնաշենքով, ցուցադրեց սենյակները։
«Այստեղ 42 սենյակ կա, ամբողջ մոդուլը զրոյից է կառուցվել։ Տեսեք՝ սենյակում կա մահճակալ, հեռուստացույց, կանչի կոճակ։ Այստեղ դուռն է, որից մտնելու է պացիենտը ու ստիպված չլինի ինչ-որ մեկի հետ շփվել։ Սա իր օրինակի մեջ մեր առաջին փորձն է նման մոդուլ նման արագությամբ կառուցելու», - ասաց Թորոսյանը ուղիղ եթերում։
Նա նաև հավելեց, որ իր գտնվելու պահին ինֆեկցիոն հիվանդանոցում կորոնավիրուսով վարակված 200 բուժայցելու է հոսպիտալացված, որոնցից որոշները դուրս են գրվելու։ Թորոսյանի խոսքով՝ կա մեկ ծայրահեղ ծանր վիճակում գտնվող հիվանդ, որը հոսպիտալացված է Օրթոպեդիկ հիվանդանոցում։ Նախարարը նշեց, որ «Նորքից» հետո ուղևորվելու է այդ հիվանդանոց՝ տեղեկանալու նրա առողջական վիճակի մասին։
Հիշեցնենք՝ այսօրվա դրությամբ Հայաստանում կորոնավիրուսով վարակվածների թիվն արդեն հասել է 736–ի։
Կորոնավիրուսից 7 մարդ է մահացել։ Բուժվել է 43 մարդ, փաստացի բուժվողների թիվը 686 է։
Հայաստանում տասնվեց հաստատություն կա, որտեղ պահվում են թե՛ դրական, բայց թեթև վիճակում գտնվող հիվանդները, թե՛ այն քաղաքացիները, որոնք շփվել են վարակված մարդկանց հետ։
Նախնական կալանքից 2 անձ ազատ է արձակվել. ՔԿՀ–ներում պայքարում են կորոնավիրուսի դեմ
Բայց 9 կազմակերպություն էլ կա, որոնք զբաղվում են գրեթե միայն կորոնավիրուսով հիվանդների բուժմամբ` «Նորքի» ինֆեկցիոն հիվանդանոցը, Օրթոպեդիայի ինստիտուտը, Ոստիկանության հոսպիտալը, «Սուրբ Աստվածամայր» բժշկական կենտրոնի ծննդատան մասնաշենքը, Արտաշատի բժշկական կենտրոնը, Գյումրու և Վանաձորի ինֆեկցիոն հիվանդանոցները, Կապանի բժշկական կենտրոնի առանձին մասնաշենքը։
ՀՀ առողջապահության նախարար Արսեն Թորոսյանը երեկ հայտնեց, որ այսուհետ «Սուրբ Գրիգոր Լուսավորիչ» բուժկենտրոնը կծառայի միայն որպես կորոնավիրուսի դեմ պայքարող հիվանդանոց՝ ունենալով ամենամեծ մահճակալային ֆոնդը։
Վարակվածներին կտանեն «Սուրբ Գրիգոր Լուսավորիչ». թաղամասի բնակիչներն առիթ ունե՞ն վախենալու
