ԵՐԵՎԱՆ, 2 ապրիլի – Sputnik. ՀՀ աշխատանքի և սոցիալական հարցերի նախարարությունը հանդես կգա աշխատանքային օրենսգրքում փոփոխություններ կատարելու նախագծով։ Տեղեկությունը կառավարության մամուլի կենտրոնում կայացած ասուլիսի ժամանակ հայտնեց ՀՀ աշխատանքի և սոցիալական հարցերի նախարար Զարուհի Բաթոյանը։
«Նախագծում նախ «ֆորս մաժոր» ասվածն ենք սահմանում, թե դա ինչ է, և որն է աշխատանքային պայմանների անհնարինությունը։ Հեռավար աշխատանքին է անդրադարձ կատարվում, քանի որ այն ամրագրված չէ գործող օրենքում։ Առաջարկ կա նաև փոխհատուցել աշխատակցին` աշխատած ժամերի դիմաց` անկախ այն հանգամանքից, թե դրանք կանոնավո՞ր, թե անկանոն կլինեն»,–ասաց նախարարը։
Բացի այդ, ըստ նրա, ծնողները, որոնք դպրոցահասական կամ մանկապարտեզ հաճախող երեխա ունեն, ապա նրանց` աշխատանքից ուշանալը պետք է ներելի համարվի։ Աշխատանքային օրենսգրքի փոփոխությունները կվերաբերեն նաև արտակարգ դրության ժամանակ աշխատաժամերին, որոնք հիմա ավելի շատ գործընկերային հարաբերությունների հիման վրա են կարգավորվում, ինչը վատ չէ, սակայն կանոնակարգման կարիք կա։
Բաթոյանը հայտնեց նաև` աշխատանքային օրենսգրքի փոփոխությունների նախագիծն արդեն շահագրգիռ անձանց հետ քննարկվել է և մոտ օրերս կուղարկվի Ազգային ժողով։
Բազմազավակ ընտանիքները միայն նպաստով կբավարարվեն. աջակցություն նախատեսված չէ
Հիշեցնենք, որ կորոնավիրուսի կանխարգելման նպատակով Հայաստանում արտակարգ դրություն է սահմանվել մարտի 16-ից։ Մի շարք ոլորտի աշխատակիցներ բողոքներ էին ներկայացնում, որ գործատուն այս ժամանակահատվածում ստիպում է հարկադիր արձակուրդի գնալ, կամ էլ նրանք չեն աշխատելու, սակայն չեն էլ վարձատրվելու։
Կորոնավիրուսից ու արտակարգ դրությունից տուժած ընտանիքներն աջակցություն կստանան
Կառավարությունը մի շարք սոցիալական ծրագրեր է մշակել, որոնց միջոցով կարող են աջակցություն ստանալ չաշխատող կամ աշխատանքը կորցրած ամուսին ունեցող հղիները, կորոնավիրուսի հետևանքով անգործ մնացած վարձու աշխատողները և այլն։
