ԵՐԵՎԱՆ, 31 մարտի – Sputnik. Կորոնավիրուսային հիվանդությամբ հաստատված դեպքով ևս մի քաղաքացի այսօր «Նորք» ինֆեկցիոն կլինիկական հիվանդանոցի վերակենդանացման բաժանմունքից տեղափոխվել է բուժական բաժանմունք: Լավ լուրը Facebook-ի իր էջում հայտնում է առողջապահության նախարարի մամուլի խոսնակ Ալինա Նիկողոսյանը։
Աշխատանքի գնացողն առաջիկա օրերին պետք է ապացույց ունենա, որ գնում է աշխատավայր
«Ցանկանում ենք նշել, որ բժիշկները պացիենտների վիճակը կայունացնելու համար արել են ամեն ինչ, այդ թվում` սրտանոթային քրոնիկ հիվանդություններով, նախկինում մասնահատված թոքով և ուղեկցող այլ առողջական խնդիրներով քաղաքացիներին դուրս են բերել ծանր վիճակից»,-գրել է Նիկողոսյանը:
Նա նաև շնորհակալություն է հայտնել Հայաստանի բոլոր ռեանիմատոլոգներին և ինֆեկցիոնիստներին:
Հիշեցնենք՝ ըստ պաշտոնական տվյալների` Հայաստանում արդեն 532 մարդ է վարակվել կորոնավիրուսով։
Բուժում են ստանում 499–ը: Վարակվածներից 90-ի մոտ թոքաբորբ է ախտորոշվել, նրանցից 30-ի վիճակը ծանր է։
Հայաստանում այս պահին կորոնավիրուսից մահանալու 3 դեպք է գրանցվել։
