ԵՐԵՎԱՆ, 30 մարտի – Sputnik. ՀՀ աշխատանքի և սոցիալական հարցերի նախարար Զարուհի Բաթոյանը կառավարության այսօրվա նիստում հայտնեց, որ 2020թ. մարտի 13–ից մինչև մարտի 30-ը ընկած ժամանակահատվածում աշխատանքից ազատվածներին նվազագույն ամսական աշխատավարձի չափով (68 հազար) միանվագ աջակցություն կտրամադրվի։
«Աջակցությունից չեն կարող օգտվել այն անձինք, որոնց աշխատանքից ազատվելուն նախորդող 2 ամիսների միջին ամսական աշխատավարձի չափը գերազանցել է 500 000 դրամը։ Ինչպես նաև նրանք, ովքեր մարտի 30-ի դրությամբ աշխատանքային հարաբերությունների մեջ են գտնվել նաև այլ գործատուի հետ կամ նույն գործատուի հետ այլ աշխատանքային պայմանագրի հիման վրա»,–ասաց նախարարը։
Նրա խոսքով` աջակցություն չեն ստանա նաև նրանք, ովքեր մարտի 30-ի դրությամբ հանդիսացել են անհատ ձեռնարկատեր և ում գործունեությունը նույն ամսաթվի դրությամբ ՀՀ հարկային օրենսգրքով նախատեսված կարգով դադարեցված չի եղել։
Բաթոյանը նշեց` աջակցություն չեն ստանա նաև կառավարության նախորդ ծրագրում ընդգրկվածները` անչափահաս երեխա ունեցողները, քանի որ նրանք արդեն իսկ աջակցություն են ստանալու այդ ծրագրով։
Ի դեպ, սա կառավարության` կորոնավիրուսի տնտեսական հետևանքների չեզոքացման վեցերորդ միջոցառումն էր, որը հաստատվեց։
Այդ օգնությունը ստանալու համար էլեկտրոնային եղանակով պետք է դիմել աշխատանքի և սոցիալական հարցերի նախարարությանը։ Դիմումները կընդունվեն ապրիլի 2-ից հետո։
Հիշեցնենք, որ ըստ կառավարության նախորդ ծրագրի` պետական աջակցություն կստանան Հայաստանում հաստատված արտակարգ դրության ու կորոնավիրուսի տարածման հետևանքով սոցիալական դժվարությունների առաջ հայտնված, մինչև 14 տարեկան երեխա ունեցող ընտանիքները: Աջակցությունը միանվագ նպաստի ձևով է, յուրաքանչյուր երեխայի համար՝ 100 000 դրամի չափով։
Կորոնավիրուսի տարածման կանխարգելման նպատակով Հայաստանում մարտի 16–ից ապրիլի 14–ն արտակարգ դրություն է սահմանվել։
Ուզում են արտակարգ դրության ընթացքում հսկել` ով ում հետ է շփվում ու երբ ուր է գնացել
