ԵՐԵՎԱՆ, 28 մարտի – Sputnik. Հոլիվուդյան դիզայներ, Քարդաշյանների ընտանիքի դիմահարդար Հրուշ Աճեմյանը շնորհավորել է հոր ծննդյան օրը և Instagram–ի իր բաժանորդներին պատմել նրա հետ ունեցած բարդ հարաբերությունների մասին։
Աճեմյանը նշել է, որ հայրը եղել է իր համար կյանքի առաջին ուսուցիչը, որը սովորեցրել է երբեք չնահանջել, կարողանալ պաշտպանել ինքն իրեն այն ժամանակ, երբ հայրն իր կողքին չէ։
«Կյանքս». Քլոե Քարդաշյանի հայ ընկերուհին նրան հայերեն է սովորեցնում. լուսանկար
«Նա ինձ ռիթմի զգացողություն և պարել է սովորեցրել, և մենք միշտ միասին ժպիտով դուրս էինք գալիս պարահրապարակ։ Նա սովորեցրել է ինձ սատանայի նման խմել, սովորեցրել է դիմանալ ցավին և հաղթահարել վախը։ Նա օգնել է հաղթահարել հիվանդությունները և համառորեն իրականացնել երազանքներս»,–գրել է աղջիկը։
Հրուշը նաև ընտանեկան կյանքի կադրերով տեսանյութ է հրապարակել։
View this post on Instagram
Նրա խոսքով` իրենից շատ բան էին սպասում ոչ միայն դպրոցում սովորելու տարիներին, այլև հետագայում։ Հայտնի դիմահարդարը խոստովանել է, որ հոր հետ բավական բարդ հարաբերություններ է ունեցել։
Նրա պատմելով` հայրը «պարետային ժամ» էր սահմանում. ինքը պետք է տուն վերադառնար երեկոյան 9-ից ոչ ուշ, և այդպես շարունակվել է մինչև իր 25 տարին լրանալը։
«Նա երբեք չէր ժպտում այն տղային, որի հետ հանդիպում էի։ Մենք տարօրինակ հարաբերություններ ունեինք։ Նա խիստ էր ինձ հետ։ Լավ համբավ ունեցող հարգված մարդ էր, և այդ համբավը պահպանել էր պետք, հատկապես մեր մշակույթում, որտեղ կանոնները շատ են։ Կանոններ, որոնք ես հրաժարվում էի պահպանել` դրանք սեքսիստական համարելով»,–նշել է Հրուշը։
Միևնույն ժամանակ, նա սովորեցրել է աղջկան լինել ուժեք։ Ավելի ուշ աղջիկը հասկացել է, որ հայրը ևս թերություններ ունի. չէ՞ որ ոչ ոք կատարյալ չէ։
«Ես պետք է ամուսնանայի 18 տարեկանում, բայց ես այլ երազանք ունեի, որը տարբերվում էր կանոններից»,–ասում է Հրուշը։
Սահմանված կանոնները նրա մոտ զայրույթ էին առաջացնում, և նա որոշեց հեռանալ ծնողներից։ Այն օրը, երբ նա լքեց տունը, գիտեր, որ կոտրել է հոր սիրտը։
«Տարիներ պահանջվեցին, որ մեր հարաբերությունները կարգավորվեն։ Դա ամենածանր քարն էր, որ կար սրտիս վրա։ Դու իմ առաջին սերն էին, և ես միշտ պայքարել եմ այն մտքի հետ, որ անհարգալից վերաբերմունք եմ դրսևորել այն միակ տղամարդու նկատմամբ, ում իսկապես սիրել եմ»,–նշում է Աճեմյանը։
Միևնույն ժամանակ, Հրուշը խոստովանում է, որ հենց հայրն է ազդել իր բնավորության վրա, հենց նա է օգնել կյանքում շատ բանի հասնել։ Նա շնորհակալություն է հայտնել հորը, որ նա թույլ է տվել ապրել ազատ, սեփական սխալները գործել և դառնալ այնպիսին, ինչպիսին կա։
«Ծնունդդ շնորհավոր, արքաների արքա։ Դու այնքան բան ես վերապրել հանուն սեփական դուստրերի ազատության ու անկախության։ Դու թույլ տվեցիր, որ լինեմ այնպիսին, ինչպիսին կամ։ Սիրում եմ քեզ, հայրիկ»,–գրել է Աճեմյանը։
Նշենք, որ Հրուշ (Հրանուշ) Աճեմյանը ծնվել է 1987 թվականի հուլիսի 19-ին, այն ժամանակ դեռ Խորհրդային Հայաստանում։ Արդեն ԽՍՀՄ–ի փլուզումից հետո, երբ նա 5 տարեկան էր, ընտանիքը տեղափոխվեց ԱՄՆ։ Այսօր Աճեմյանը Հոլիվուդում հայտնի դիմահարդար է, նա նաև հագուստի դիզայնով է զբաղվում։
Ինչպես Ռուբեն Բաղդասարյանն անփոխարինելի դարձավ նորաձևության աշխարհում. լուսանկարներ
