ԵՐԵՎԱՆ, 27 մարտի – Sputnik. «Ռոսիա սեգոդնյա» ՄՏԳ–ն միացել է COVID-19–ի դեմ պայքարի դաշինքին, որը ստեղծել են Ռուսական ուղիղ ներդրումների հիմնադրամը, Ռուսաստանի արդյունաբերողների և գործարարների միությունը, «Яндекс»–ը և Mail.ru Group–ը։ Տեղեկությունը հայտնում է գործակալության մամուլի ծառայությունը։
«Ռոսիա սեգոդնյա» ՄՏԳ–ն ակտիվ մասնակցություն կունենա դաշինքի նախագծերի տեղեկատվական ապահովման հարցում», – նշում են մամուլի ծառայությունից։
Կորոնավիրուսի դեմ պայքարի շրջանակում Ռուսական ուղիղ ներդրումներ հիմնադրամի և «Ռոսիա սեգոդնյա» ՄՏԳ–ի առաջին համատեղ նախագիծն է դարձել «Կորոնավիրուսի նոր՝ COVID-19 վարակի կանխարգելման և բուժման ձեռնարկի» հրատարակումը։ Սա աշխարհում առաջին գիրքն է, որը նկարագրում է հիվանդության կանխարգելման և վերահսկման, ախտորոշման և բուժման, ինչպես նաև վարակվածների խնամքի վերաբերյալ կուտակված փորձը։
Ձեռնարկը կազմել է Չժեցզյան նահանգի բժշկության համալսարանի առաջին ակադեմիական կլինիկան` հիմնվելով ՉԺՀ–ի` կորոնավիրուսի դեմ պայքարի կլինիկական տվյալների և փորձի վրա։ Ռուսական ուղիղ ներդրումների հիմնադրամը, «Ռոսիա սեգոդնյա» միջազգային տեղեկատվական գործակալությունը և Սեչենովի անվան առաջին բժշկական համալսարանը թարգմանել են այն ու տպագրել Ռուսաստանում։ Գիրքն անվճար տարածվում է բուժհաստատություններում, ձեռնարկություններում և բոլոր շահագրգիռ մասնագետների շրջանում։
Կորոնավիրուս է հայտնաբերվել Մեծ Բրիտանիայի վարչապետ Բորիս Ջոնսոնի մոտ
«Կորոնավիրուսի նոր՝ COVID-19 վարակի կանխարգելման և բուժման ձեռնարկը» կարելի է վերբեռնել այս հղումով։
«Ռոսիա սեգոդնյա» ՄՏԳ–ի գլխավոր տնօրեն Դմիտրի Կիսելյովը հավաստիացրել է, որ կորոնավիրուսի մասին մարդկանց իրազեկելու համար գործակալությունը գործի կդնի իր բոլոր ռեսուրսները։
«Մենք որոշեցինք միանալ դաշինքին` օգտագործելու համար մեր բոլոր հզորությունները, մեր միջազգային գործակալության բոլոր ռեսուրսները այս դժվարին ժամանակահատվածում մարդկանց օպերատիվ և ճշգրիտ տեղեկություն հասցնելու և կորոնավիրուսի դեմ պայքարի նոր պրակտիկաներ գտնելու համար։ Այսօր սա մեր մասնագիտական պարտքն է, մեր ընդհանուր պատասխանատվությունը», – ասել է Կիսելյովը։
Ռուսական ուղիղ ներդրումների հիմնադրամի գլխավոր տնօրեն Կիրիլ Դմիտրիևն էլ կարծում է, որ ընթացիկ իրավիճակի ու վիրուսի տարածման դեմ պայքարի կիրառվող միջոցների մասին հրատապ ու ճշգրիտ տեղեկություններ հայտնելը կորոնավիրուսը հաղթահարելու անհրաժեշտ պայմաններից է։
«Ռոսիա սեգոդնյա» ՄՏԳ–ի բարձր պրոֆեսիոնալիզմն ու օպերատիվությունը էապես կուժեղացնեն դաշինքն ու որակապես կաջակցեն նախագծերի տեղեկատվական ապահովմանը։ Գործակալությունն արդեն ցուցադրել է նոր պրակտիկաների և դրանց մասին հանրությանն իրազեկելու իր կարողությունները` Ռուսական ուղիղ ներդրումների հիմնադրամի հետ համատեղ հրատարակելով կորոնավիրուսի դեմ պայքարի ձեռնարկի ռուսերեն տարբերակը, որում ներկայացվում է վիրուսի նոր տեսակի դեմ պայքարի առաջնագծում հայտնված Չինաստանի առաջատար կլինիկայի անգին փորձը։
Կորոնավիրուսն ու աշխարհը. G20-ի երկրներից որ երկուսի ձեռքում է փրկության բանալին
«Ռոսիա սեգոդնյա» ՄՏԳ–ի կազմում ընդգրկված ՌԻԱ Նովոստիի և Sputnik–ի տեղեկատվության ճշգրտությունը, օպերատիվությունն ու բարձր որակը միշտ բարձունքում են եղել և այսօր էլ լրատվության առավել լիարժեք աղբյուր են մարդկանց համար», – ասել է նա։
Կորոնավիրուսի գրոհն աշխարհի վրա շարունակվում է. մարտի 27-ի տվյալներ. Worldometer
