Տարածքային կառավարման և զարգացման նախարարի առաջին տեղակալ Վաչե Տերտերյանը ԱԺ–ում ներկայացրել է համայնքների խոշորացում նախատեսող օրինագիծը, որի համաձայն նախատեսվում է իրականացնել համայնքների միավորման երկու ծրագիր ՀՀ Լոռու մարզի Լերմոնտովո և Տավուշի մարզի Իջևան համայնքային փնջերում։ Ըստ այդմ` 21 համայնքների միավորման արդյունքում ձևավորվելու է երկու համայնք։
Խաչատրյան․ «Հողը կոստյում չէ, որ առնես, կախես պահարանում»
ՀՀ Լոռու մարզպետ Անդրեյ Ղուկասյանի տեղեկացմամբ` Լոռու մարզը կազմված է կիսով չափ կամ մի փոքր ավելի շատ արդեն իսկ խոշորացված համայնքներից, իսկ մնացած մասը դեռ առանձին համայնքներ են, և այս տարի նախատեսվում է Լերմոնտովո ու Անտառաշեն համայնքների միավորումը։
«Գտնում եմ, որ այդ գործընթացն այլընտրանք չունի, և պետք է բոլոր համայնքները խոշորացվեն, որովհետև հնարավոր չէ պատկերացնել կիսով չափ խոշորացված կամ կիսով չափ առանձնացված համայնքների գոյությունը։ Դա իր հերթին առաջացնում է խնդիրներ։ Այդուհանդերձ, եթե գնահատենք խոշորացման արդյունքները մեր մարզում, ապա դրանք բավականին դրական են ու հուսադրող։ Այն ծրագրերը, որոնք իրականացվում են այդ համայնքներում, մի քանի, գուցե տասնյակ անգամ ավելի շատ են, քան առանձին համայնքներում»,– նշում է Լոռու մարզպետը։
Անդրեյ Ղուկասյանի փոխանցմամբ` խոսքն առնչվում է ֆինանսական միջոցների, բյուջեի մեծության, գումարների կառավարման, ծախսման հետ կապված հարցերին։ Ըստ այդմ` Լոռու մարզում կան առանձին համայնքներ, որոնք չեն կարող մասնակցել սուբվենցիոն ծրագրերին իրենց բյուջեի սղության և փոքր լինելու պատճառով, հետևաբար, նշված համայնքների զարգացումը կլինի միայն խոշորացումից հետո։
«Անցյալ տարի Տարածքային կառավարման նախարարության ներկայացուցիչը, վարչության պետը և մարզպետարանի աշխատակիցները բոլոր համայնքներում հանդիպումներ են ունեցել բնակիչների հետ, լսել են նրանց կարծիքները, պատասխանել խնդրահարույց հարցերին»,– նշում է Լոռու մարզպետը։
Անդրեյ Ղուկասյանն առանձնացնում է երկու խնդիր. նախ` որոշ համայնքապետեր ընդդիմանում են խոշորացման գործընթացին, որովհետև արդյունքում կորցնելու են իրենց պաշտոնը, այսինքն` ունեն անձնական մոտիվացիա, ուստի գործընթացը քաղաքացիներին ներկայացնում են բացասական լույսի ներքո, և երկրորդ` կան շատ քաղաքացիներ, որոնք կողմ են խոշորացմանը զուտ այն պատճառով, որ ազատվեն անհաճո համայնքապետերից։ Լոռու մարզպետի համար երկու մոտեցումներն էլ անընդունելի են։
Ըստ նրա` գործընթացին պետք է նայել համայնքների ճիշտ կառավարման, զարգացման, ուժերի մեկտեղման տեսանկյունից։
Հայաստանը հոգնել է ընտրություններից. համայնքների խոշորացումից մինչև ընտրական բոյկոտ
