ԵՐԵՎԱՆ, 25 մարտի – Sputnik. Ռուսաստանից հացահատիկ արտահանելու արգելքը, որն առաջարկել է ՌԴ կառավարությունը, այս պահին չի սպառնում Հայաստանի պարենային անվտանգությանը: ՀՀ փոխվարչապետ Մհեր Գրիգորյանն ԱԺ-ում, պատասխանելով պատգամավորների հարցերին, անդրադարձավ ՌԴ-ից Հայաստան հացահատիկ ներմուծելու խնդրին:
«Նման խնդիր իսկապես առաջացել էր, մենք հարցը բարձրացրել ենք ԵԱՏՄ հարթակում, այսօր նիստը կայացել է: Պայմանավորվածություն կա, որ նման իրավիճակները կբացառվեն: Ուղղակի ռուսական կողմը խնդիր է դնում, որ ԵԱՏՄ երկրներից յուրաքանչյուրն իր սահմանների համար նման արգելքներ դնի, որպեսզի չստացվի, որ ԵԱՏՄ մի երկրի միջոցով հացահատիկը գնում է երրորդ երկիր»,- ասաց Գրիգորյանը:
Նրա խոսքով` հարցը վերջնականապես կկարգավորվի ապրիլի 3-ին:
Ճգնաժամը նոր հնարավորություններ է բացում. Փաշինյանը տվյալներ է հայտնել
Հացահատիկից բացի, խնդիր է առաջացել նաև բժշկական սարքավորումների արտահանման սահմանափակման ոլորտում: Այս հարցը, փոխվարչապետի խոսքով, դեռ քննարկման փուլում է: Գրիգորյանը հույս հայտնեց, որ այդ հարցը ևս առաջիկայում կկարգավորվի:
Ավելի վաղ Ռուսաստանի կառավարությունն առաջարկել էր սահմանափակել հացահատիկի արտահանումը կորոնավիրուսի պատճառով։
