ԵՐԵՎԱՆ, 23 մարտի-Sputnik. Ոչ միայն կորոնավիրուսի համավարակի օրերին, այլև միշտ Շտապօգնության ծառայությունն աշխատում է արտակարգ ռեժիմով։ Այսօր Կառավարության մամուլի կենտրոնում տեղի ունեցած ասուլիսում ասաց «Երևանի շտապօգնություն» ՓԲԸ տնօրեն Թագուհի Ստեփանյանը՝ անդրադառնալով այս օրերին ծառայության գործունեությանն ու ծանրաբեռնվածությունը։ Նրա խոսքով՝ այս շրջանում շտապօգնության կանչերի թիվը, որքան էլ զարմանալի է, նվազել է։
«Եթե հունվար, փետրվար ամիսներին մենք օրական ստանում էինք 900-950 կանչ, ապա հիմա դրանց թիվը հասել է 700-750-ի»,- ասաց նա։
Ըստ շտապօգնության կանչերի դասակարգման, կանչերի վերլուծությամբ, առաջին տեղում սրտանոթային, ապա սուր շնչառական խնդիրներն են, երրորդ տեղում՝ վնասվածքները։
Ստեփանյանը հետաքրքիր վիճակագրություն է ներկայացնում՝ սուր շնչառական հիվանդությունների հետ կապված կանչերի թիվն էլ է պակասել։
«Եթե նախկինում մենք օրական 150-220 կանչ էինք ստանում, այսօր 100-140 հիվանդ ենք ունենում»,- նշեց նա։
Շտապօգնության ծառայության ղեկավարը հայտնեց, որ կորոնավիրուսով հիվանդ 194 քաղաքացիներից մի քանիսին հիվանդանոց են տեղափոխել շտապօգնության բրիգադները, նաև հավելեց, որ այս պահին մեկուսացած կամ ինքնամեկուսացած շտապօգնության ոչ մի բժիշկ չկա։
Զավեշտալի զանգեր և զվարճալի կանչեր․ մեկ օր հայկական «911» ծառայության առօրյայից
Ստեփանյանն անդրադարձավ նաև կորոնավիրուսի ախտորոշման արագ, այսպես կոչված՝ ռապիդ թեստերին, որոնք շուտով կլինեն Հայաստանում։ Նրա խոսքով՝ լավ կլինի, եթե շտապօգնության ծառայությանն էլ այդ թեստերից տրամադրվեն, ինչը հնարավորություն կտա թեթևացնելու «Նորք» կլինիկական ինֆեկցիոն հիվանդանոցի ծանրաբեռնվածությունը։
Նա հորդորեց, որ կորոնավիրուսի ախտորոշման համար չդիմեն շտապօգնության ծառայությանը, քանի որ ծառայությունը ախտորոշում չի իրականացնում։
